Ka long biej ban pynjlan shi pynjlan ïa ka elekshon MDC, ai ba u paidbah un rai: Bah Titos

Shillong, Jylliew 26 : U nongïalam ka Liang Pyrshah ha KHADC, Bah Titos W Chyne ha ka sngi Balang u la ong ba ka long biej ban pynjlan shi pynjlan ïa ka elekshon MDC namar ha kaba khatduh hi dei u paidbah ban ai ïa ka rai.
Haba kren bad ki lad pathai khubor, u Bah Titos ba dei ruh u MDC ka Sohra u la ong ba ka elekshon hi mar ïa kut ka samoi hi dei ban pynlong noh. Tangba u ong ba ha kane ka kynti mynta pat ym lah ban lei ei ei namarba ka sorkar ka pynjlan ïa ka elekshon na ka daw ba ka Delimitation Committee kam pat lah ban aiti ïa ka kaiphod.
“Kumba long mynta, na ka liang jongngi ka party ngi long kiba la pynkhreh ban ïakhun ïa kane ka elekshon bad ngi da kwah ruh ba kane kan long noh katkum ka por ba la buh ym ban shu pynjlan shi pynjlan kumne. Ka long biej ïangi ban pynjlan shi pynjlan bad ka bha ba leit noh sha u paidbah bad ai ba u paidbah un rai,” u la ong.
Shwa kane, u Bah Titos u la ong ba ka kamram jong ka Delimitation Committee ka long ban aiti noh ïa ka kaiphod namar la ai ha ki ïa ka por kaba kylluid. “Hynrei ka shong pat ha ki ruh la ki kloi neem ban aiti ïa ka kaiphod naba ka jingkwah jongngi ka long ba ka kaiphod kan long kaba biang ym dei shuh ban don ka jingïania ban don ka jingïatai ne ka jingpynbeit shuh shuh naba kata kan shim por.”
Katkum ka jingong jong u, kane ka jingpynbeit thymmai ïa ki constituency kan ktah hi jan baroh khamtam ha kito ki constituency kiba don bun bha ki nongthep vote kiba la palat ïa ka 30,000 ngut.
Shuh shuh haba jubab pat halor ka jingkylli, u Bah Titos u la ïathuh ruh ba kumba long haduh mynta baroh ki MDC jong ka party ki pynpaw beit ba ki la pynkhreh ban ïakhun beit na ka party ha kane ka elekshon MDC.
Ha kawei pat ka liang, une u heh UDP u la ong ruh ba lada nujor ïa ka elekshon MP bad ka elekshon MDC ka ïapher baklybak. U ong ruh ba ïa kane ki sakhi ha ka elekshon MP kaba la dei ha kaba u Dr. Jemino Mawthoh u long u kyrtong monlang jong ka sorkar hynrei u shah rem.