Khynra ka tnad Excise ïa ka jaka shna kyiad beaiñ ha Shillong By-pass

Nongpoh, Lber 4: Da ka jingioh lum jingtip kaba bniah na ka tnad Excise na Assam bad ryngkat ka jingbthah na u Commissioner ka tnad Excise ka sorkar Meghalaya, ka tnad Excise na Ri Bhoi ka la leit ban khynra ïa kawei ka jaka shna kyiad beaiñ ha Shillong By-pass bad ka la ioh ruh ban kurup shibun ki tiar ki tar kiba pyndonkam ha kaba shna kyiad beaiñ.
Kane ka jingleit khynra, ka dei ha ka sngi u Blei ha ka por 1.30 mynsngi ha kaba ka tnad Excise ka la leit ban khynra ïa ki ar tylli ki jaka, kata kawei ha Industrial Area ha Umiam bad kawei pat ha ka surok Shillong By-pass kaba ki la ioh kurup ïa ki tiar ki tar ne ki kor ki bor ha Shillong By-pass bad ha Industrial Area ha Umiam pat kim shym la lap eiei.
Kane ka jingleit khynra ka tand Excise ïa kitei ki jaka ba la suba shna kyiad beaiñ ha Ri Bhoi, ka dei ruh da ka jingïatrei lang ka tnad Excise na Assam bad na Meghalaya, kaba dei hadien ka jingioh bat ïa kawei ka Trok kaba don ïa u Number AS-11-AC-9144 ha Khanapara, ba ka tnad Excise ka la ioh ban kurup shibun ki kyiad beaiñ ba la kit da katei ka trok.
Haba kren sha ki lad pathai khubor u Superintendent ka tnad Excise na Ri Bhoi, u Bah R.C. Lyngdoh, u la pynthikna halor kane ka jingleit khynra kyiad ha katei ka jaka shna kyiad beaiñ bad la ioh kurup ruh bun ki tiar ki tar ba ki pyndonkam ha kaba shna kyiad beaiñ, kaba dei ruh lyngba ka jingïatrei lang ki Pulit na Umiam Police Station.
U la ïathuh ruh ha kane ka jingleit khynra ha katei ka jaka shna kyiad beaiñ ha Shillong By-pass hajan Umiam, la ong ba la ioh kurup bun ki tiar ki tar ba kynthup naduh kata ka blending tags, storage tank, capping machine, production lines, flavoring and coloring agents, bad kata ka counterfeit holograms jong ka Assam bad Meghalaya. La ïathuh ruh la ioh ruh ban kurup ïa ki kyiad ba la dep ban shna naduh ka OC, OC Blue, Royal Stag, b ad McDowell’s No.1 ba la kot sha ka 23000 bilor, ha kaba la shimti noh da ka tnad excise ban dang pynlong ïa ka jingtohkit.
U la ïathuh ruh ba ka tnad excise ka la ioh kurup ruh ïa kita ki excise labels kiba dei na Meghalaya bad Assam rynkat ki bilor thylli bad ki song Carton ba ki pyndonkam ha kaba song ïa kitei ki kyiad beaiñ.
U SE ka Ri Bhoi, u Bah R.C Lyngdoh u la ïathuh ruh ba wat la ki la ioh ban kurup ïa kitei ki tiar ki tar kiba long ka sakhi halor kane ka jingshna kyiad beaiñ, hynrei ïa ki briew ba don kti ha kane ka kam kim pat lap satia ha kaba ki dang pynlong ïa ka jingtohkit bad ruh lada ki la lap ïa kita ki briew ba don kti kin sa ujor sha ki bor ka ain khnang ba kin shah ban pynshitom katkum ki kyndon jong ka aiñ, u la bynrap.