Khliehriat, Lber 4: Ka District Child Protection Unit (DCPU) East Jaiñtia Hills District ha ka sngi Baar ka la ai jingpynshai sha ki khynnah ha ka shnong Bamkhosngi ba la ïashim bynta lang da ki longkmie, ki longkpa, ki nonghikai, ki khynnah skul kynthup ruh u Waheh Shnong jong ka shnong Bamkhosngi Bah Nangiaid Pashiang.
Ka Project Coordinator jong ka Child Helpline Office ka Kong Khwnkijuh Pala ka la pynshai ïa ki kam ba ka tnat ka leh ha kaba ai jingshakri ïa kito kiba ngat ha ki jingshah leh beiñ, ki jingshah banbeiñ, kiba shah leh be-ijot bad ong ruh ba ka tnat ka ai ruh ïa ki jingiasyllok ban kyrshan bad pynkhlaiñ ïa ki lanot ha ka bor jingmut, jingpyrkhat bad la pynshai ruh halor kiwei kiwei ki lad ai jingiarap.
Ka Legal-cumProtection Officer jong ka District Child Protection Unit, Khliehriat ka Kong Elva Mary Lapasam ka la pynshai bad pynsngewthuh halor kiba bun ki mat kiba iadei bad ka aiñ POCSO Act, JJ Act, Child Marriage, Child Right bad kiwei kiwei, kiba dei kita ki aiñ kiba ai jingiada ïa ki khynnah kito kiba hapoh ka 18 snem kyrta, kiba dei ruh ki aiñ kiba iada ïa ki hok jong ki khynnah kiba dei ruh na ka bynta ka bha ka miat jong ki.
Ha kane ka prokram la pynlong ïa ka jingialehkai skit balyngkot kaba iadei bad ka POCSO Act.
