Jowai, Lber 04: Ka Jaiñtia Tribal Traders’ Association (JTTA) ka la kyntu ïa baroh ki nongshong die kiba don ïa ki Permit ha ki bynta ka Iawmusiang bad Iawthymme hapoh ka jingpeit jong ka JHADC ba kin sangeh shwa ban leit siew pynthymmai ïa ka bai Permit jong ki kaba shisien shisnem.
Kane ka jingbthah na ka JTTA sha ki para nongshong ïew ka long hadien ba ka Council ka la pynkiew ar shah ïa ka bai Permit, kata, na kaba juh siew tang T. 750 sha ka T. 1,300 ha ka shi snem.
Ka seng ka la ïathuh ha kaba ïadei bad kane ka kam pynthymmai Permit, ka dang don mynta hapdeng ka jingïakren bad ki bor jong ka District Council, kumta ka seng ka kwah ban ïoh shwa ïa ka jubab ba shai na ka Council halor ka dor jong ka Permit.
Ka seng ka ladep ban phah da ka shithi sha ka District Council ha shwa ban pynlong ïa ka Election MDC, da kaba leit kynduh ïa ka Officer Incharge jong ka tnad, hynrei ka jubab kaba la ïoh ka long ba yn sa phah ïa kane sha Executive Committee ba thymmai jong ka Council.
Kumta ka Jaiñtia Tribal Traders Association lyngba u President Bah Iatha Najiar ka la kyntu ïa baroh ki nongshong ïew kiba hap ban pynthymmai ïa ki Permit ba kin ïaishah shwa shipor tad haduh ban da ïoh ïa ka juba na ka Council.
