Nongstoiñ, Naitung 10: Ka jingpynthiah thai jong ka sorkar ban pyndep ïa ka jingpyntrei ïa ka Kynshi Hydel Electric Power Project, kaba dei ka project pynmih bording kaba 450 Megawatts, ka la pynlyngngoh ngaiñ ïa ki nongïalam jong ka Synjuk Trai Khyndew Sangriang Mawpon Area bad ki paitbah jong katei ka thaiñ baroh kawei.
U bah Roshem Myrthong vice president ka Synjuk ha ka jingïakynduh lang bad ki nongthoh khubor mynta ka sngi, u la pynpaw ïa ka jinglyngngoh kaba khraw, namar ba naduh ba ka sorkar ka la aiti sha ka Brahmaputra Board ba kan sorbe ïa katei ka project, ka Brahmaputra Board ka la pyndep lut nadong shadong.
Hadien kata ka sorkar ka la khot aiti ha ka Athena Company ba kan shimti ïa ka bynta ban pynmih bording, hynrei haduh mynta katei ka projek ka la shu sahkut khlem seisoh satia.
Utei u nongïalam ka Synjuk u la ong ruh ba hadien ba ka Athena Company ka la shimti la pyndep ïa ka Detail Project Report, la ïasoi ruh ïa ka soskular bad baroh ki trai khyndew bad ki paitbah jong ki shnong kiba shah kynthup ha ka area jong katei ka projek kata naduh Nongummer, Mawjai, New Mawjai, Nongriniang, Sangriang, Mawhiangruda, Mawpon, Mynraw bad kiwei kiwei ki shnong kiba hap ha katei ka thaiñ.
U la ong ruh ba wat ïa ka dor jong ka khyndew la dep ïa pynbeit bad mynjur lang ba kan long katkum ka dor ba la buh da ka sorkar.
Ha ka soskular ba la dep ïasoi, la kynthup lang ruh ïa ki jingmyntoi ba ka Kompeni kan ai sha ki paitbah nongshong shnong ha katei ka thaiñ, kata naduh ka ba ai ei ïa ka bording, ka ai kam ai jam kat ki kam ba ki nongshong shnong ki lah ban trei kum ki kam kontrak, bad ki wei kiwei ki kam hapoh ki ophis.
U la ong ruh ba lada ïa katei ka projek pynmih bording la pyndep ha ka rukom kaba dei bad la pyntreikam, ka jingmyntoi kam dei tang ïa ki paitbah nongshong shnong jong katei ka thaiñ, hynrei ïa ki paitbah jong ka West Khasi bad South West Khasi Hills District.
U la bynrap ruh ba ka jingmyntoi kaba khraw kan long ruh ïa ka sorkar jylla lada la lah ban pynmih bording, namar ka jylla kan ym lah shuh ban pyndonkam tang ïalade. Hynrei ka hap ban die ïa ka bording sha kiwei pat ki jylla bad wat sha ka ri Bangladesh ruh.
U nongïalam ka Synjuk u la kyntu ïa ki laingut ki nongmihkhmat kata ïa u bah Pius Marweiñ MLA ka Ranikor, bah Gabriel Wahlang MLA ka Nongstoiñ bad u bah Methodius Dkhar MLA ka Mawshynrut, ba kin pynsngew sha ka sorkar ba ka dei ban pyntrei biang ïa katei ka projek bad ban pynurlong noh hapoh kine ki snem.
U la ong ruh ba ka jingkyntu jong ka synjuk ïa kitei ki nongmihkhmat, ka dei namar ki don ki shnong kiba hap ha ki Constituency jong ki bad ka jingdon jong katei ka projek, kan ai jingmyntoi ïa ki nongshong shnong ha kitei ki constituency jong ki.
