Jowai, Naitung 10: Ka Dorbar Lyiur jong ka Jaiñtia Hills Autonomous District Council (JHADC) kala kut noh tang shi sngi hi kaba la pynlong mynta hi ka sngi 10 tarik jong u Naitung, ïa kane ka Dorbar la pynïaid da u shnongknor ka JHADC u Dr. Sanki Shangpung.La sdang ïa ka Dorbar da ka kynta kylli jigkylli ba la wanrah da ki MDC ka liang pyrshah naduh u ma A.A. Shullai uba la buh jingkylli ha kaba ïadei bad ka jingkam jubor jong ka Karbi Anglong Autonomous Council ïa ka shnong Khanduli West Jaiñtia Hills, na ka liang u EM i/c ma F. Bareh ula jubab ba ka Khanduli ka dang hap hapoh u pud u sam jong ka JHADC kaba hap hapoh ka Thadlaskeiñ Block jong ka Elaka Nongjngi bad ka don ïa u Waheh Shnong bala ithuh da ka Council katkum ka Act 2015.U ma Shullai ula buh jingkylli shano ka Council kan leit bret ïa ki ñuit kiba mih na ïew Lad Stadium naduh u bnai January 2023, la pynsngew ba ym lah ban jubab ïa ka jingkylli namar ïa kane ka kam ka dang don ha ka mukot duma hapoh ka iing bishar High Court ka jylla.
Ha kaba ïadei bad ka jingduh tulop ki nongtrei ka Council ula kylli ka dei kaba shisha ba ka District Council kam pat lah ban pyllait ïa ka tulop ki nongtrei bad Member ka Council naduh u bnai October 2022 haduh u bnai May 2023 ka jubad ba u CEM ka long haoid.U ma Robinus Syngkon ula buh jingkylli ha kaba ïadei bad ka jinglum khajna kaba mih na ki District Council Forest Check Points naduh ka 1 tarik April 2022 haduh 31 May 2023, ïa kaba la jubab la ai da u CEM kaba long kumne : na Ratacherra ka long T.63,700/-, ka Mookyndur T. 9,81,852/- bad ka Garompani T. 9,450/- tyngka.Halor kane ka jubad ki liang pyrshah kila kynthoh jur halor ka jingbym biang ka rukom treikam jong ka Council kaba duna palat ka jingïoh lum khajna (revenue) da kaba ong lada ka long kumne ka jingduna palat ka jingïoh lum khajna kumno pat ka siew tulop ïa ki nongtrei?.
U ma Syngkon ula pan jingkylli ha kaba ïadei bad ki nongtrei kiba don hapoh ka Council haduh ka 31 May 2023 la jubab ba la ïoh ki don 1202 ngut. Na ka liang u ma B. Chyrmang ula kylli halor ka bhah jong ka Council kaba wan na ka 15th Finance Commission naduh ka 1 tarik April 2022 haduh 31 May, 2023 kaba long T.12,90,00,000/- tyngka bad la ïoh jubah ïa ki projek kiba don kumba 882 tylli bad kiba la dep pyntreikam ki long 405 tylli. Shuh shuh ula pan jingkylli haduh katto ngut ki bar jylla kiba la ïoh lisen na ka Council haduh ka 31 May, 2023 la jubab na u EM i/c ki don 524 ngut. Kumta ula kyntu jur ïa ka Council ba kan peit bniah bha ïa kane na kaei ka daw ba la hap ban ai haduh katne tylli ki lisen sha ki bar jylla. Ha kane ka Dorbar kum ka dak ban kynmaw burom ïa uwei na ki MDC barim uba la khlad noh u (L) C. Biam ka Dorbar kala pynlong ka jingsngap jar kaba shipor
