Yn pynbha ïa ka madan kaba 1.22 klur, ka Library bad Digital Infrastructure kaba 57 lak

Jowai, Nailur 26 : U myntri ka sorkar jylla ba peit ïaka tnad pule puthi bad uba dei ruh u MLA ka thaiñ u ma Lahkmen Rymbui mynta ka sngi ula buh ïa u mawnongrim ban tei ïa ka ïing skul jong ka Thangbuli Government L.P. School, ïa u mawnongrim ban pynbha ïaka madan ïalehkai jong ka shnong Thangbuli, kumjuh ruh ula plie ïaka Children and Adolescents Library bad ka Digital Infrastructure ha Thangbuli.
Ïa u mawnongrim ban tei ïa ka ïing skul Thangbuli Government L.P. School hapoh ka Mission Education, Phase IV, la mynjur haka jingmang pisa kaba long 70,18,887 tyngka, shi bynta na ka projek ban kyntiew ïa ka pule puthi jong ki khynnah skul ka thaiñ.
U Myntri Rangbah ula buh ruh ïa u mawnongrim ban pynbha ïa ka madan ïalehkai naduh ki jaka shong peitkai (Gallery), ki kamra bad ka Septic Tank, haka jinglut kaba 1.22 klur, lyngba kane ka projek ka pynbha shuh shuh ïa ka kam ïalehkai sports hapoh ka shnong.
Ha kane ka juh ka sngi u ma Lahkmen Rymbui ula plie paidbah ruh ïa ka Children and Adolescents Library and Digital Infrastructure ha Shnong Thangbuli, kaba la pyntreikam ha u snem 2024–25 hapoh ka State Rural Employment Society–Block Implementing Division (SRES-BID) haka jinglut kaba 57,19,190 bad kane kan ailad ïa ki khynnah bad ki samla ban ïoh jingïarap na ka library bad ki lad jinghikai digital.
Haba ai jingkren u ma Lahkmen Rymbui ula ban jur ba ka jingnang jingstad ka dei kawei na ki nongrim ba kongsan tam na ka bynta ban kyntiew ïa ki samla pule. Ula pynpaw ba ka jinghikai kam dei ban long tang haki kot pule ne ki jinghikai ha ki kamra klas, hynrei dei ban pynkup bor ïa ki da ki lad jingtip lyngba ka sap ka phong ba ki don, khnang ba kin lah ban ïaleh ïa ki jingeh haka imlang sahlang bad ban long kiba shañiah halade.
Haba ïadei bad ka Children and Adolescents cum Digital Library ba dang shu plie thymmai, u myntri ula ong ba kane ka jaka kan ïarap ïa ki samla pule ban ïoh ïa ka jingtip katkum ka jingkylla jong ka por.
U Myntri Rangbah ula pynshlur ïa ki samla pule haka liang ka kam ïalehkai Sports khnang ba kin ïoh lad ban ïashim bynta ïa ki jingïakop bapher bapher bad ban long shisha ki khlur ïalehkai ha ki sap ba ki don.
Shuh shuh u khot ïa ki paidbah ka Thangbuli khamtam ïa ki samla ba kin ïai long kawei bad ban kyrshan iwei ïa iwei haka liang ka roi ka par hapoh ka imlang sahlang. Ula pynshlur ïa ki samla pule ba kim dei ban duh mynsiem hynrei ki dei ban ïaid shakhmat lyngba ka jingtrei shitom bad ka jingïaishah.
Na ka liang u myntri ula plie ruh ïa ka 1st Amwi Higher Secondary School, Thangbuli Knock-Out Football Tournament 2026–27, ban pynmih pisa ïa ka skul. Ki kynhun kiba wan ban ïakhun nyngkong ki long hapdeng ka Jaraiñ Cultural & Sports Club pyrshah ïaka Tympang Club Pdengshakap.
Kiwei de kiba ïadondon lang ba ai jingkren ki kynthup ïa u Disuk Tariang, Member of Amwi Higher Secondary School, u ma K. Passah, Assistant Director, Directorate of Sports & Youth Affairs, u ma Medling Swer, Local MDC bad u ma Murtimom Khyrim, President, YSWC Thangbuli nalor kiwei kiwei de.