Khur takma rnong 3 ngut ki thei ïakhun kti ka jylla na ka Asian Arm Wrestling Championship ha Uzbekistan

Nongpoh, Naiwieng 28: Ki kynhun sengbhalang bapher bapher naka them Ri-Bhoi hynnin ka miet da ka jingkmen kila pdiang burom ïa 3 ngut ki thei ïa khun kti ka jylla kiba la leit ban mihkhmat naka ri sha ka Asian Arm Wrestling Championship 2023 kaba la long haka ri Uzbekistan naduh ka 17 haduh ka 25 tarik Naiwieng.
Kitei ki samla ki ba la khur takma rnong na katei ka lympung ki kynthup ïaka Samla Senebi Syngkli haka kyrdan 55 kg, ka Samla Airikmenlang Shabong haka kyrdan 50kg, bad ka Wandalin Syiemiong haka kyrdan 60kg.
Naka liang ki kynhun sengbhalang ba kynthup ïaka RBYF, MPSO, HNYF, NKU ki bahaiing hasem bad kumjuh ruh ka Kur Syngkli kila ap ban pdiang burom ïa kitei ki thei ïalehkai ha Petrol Pump Down Gate Nongpoh ryngkat bad ki Coach jong ki da ki jaiñ Ryndia bad kumjuh ruh ki syntiew ki skud.
Naka liang ki nongïalam sengbhalang haba kren ha katei ka janmiet kila pynpaw ka jingsngewkmen kaba khraw halor ka nam bad ka burom kaba kitei ki thei ïakhun kti ka jylla kila lah ban ïalehkai bha watla kim shym la ioh ban khur ïaka takma ksiar hynrei ka jingtrei shitom jong ki ka long ka burom ïaka jylla namar ka jingioh khur jong ki ïaka takma rnong.
Kila pynpaw ruh ba kane ka dei ka jingsdang jong ka jingïaid lynti ka jong ki kim dei ban kynran dien ne ban hun tang ha katei ka takma rnong hynrei ban minot thop ban kilan bha ïalade naka bynta ban khur pat sa ïaka takma ksiar na kiwei kiwei ki jingïakhun ki ban sa long haki ri ka pyrthei.
Ha kawei pat ka bynta naka liang kitei ki nongïalam sengbhalang kila buh ruh ka jingkyrpad sha ka sorkar ba ka dei ban phai khmat kyrpang ïaki samla ïalehkai ka jylla kiba don ka sap namar kumba la sakhi bun naki samla donsap ki ba ioh ban leit shim bynta shabar ri ki duna haka jingioh bad shem jingeh shibun namar ba kim ioh jingïarap naka sorkar, hynrei kane ka dei ka kynti kaba sorkar ka dei ban phaikhmat sha ki samla ba don sap khnang ba ka kam ïalehkai sports kan kiew haka jylla.
Naka liang u Bah Alan Sun ba dei ruh u Coach jong kitei ki thei ïalehkai bala khur takma u la ainguh ïa u Blei u ba la ri la sumar ïaki naduh ba ki mih nala iing ban leit shim bynta ha katei ka lympung bad ka jingkhublei ba kyrpang ïa ki kynhun sengbhalang kiba la synran lang naduh Guwahati, ba ka jingpynshit pynshngaiñ bad ka jingkyrshan jong ki ka pynrhem ïaka mynsiem jong kitei ki nongïalehkai bad khmih lynti ha ki snem ban wan ba ki dang lah shuh shuh ban khur takma.