Da ka prokram Hamara Viksit Bharat Sankalp Yatra yn ai jingtip sha ki paidbah halor ki skhim pynroi
Nongpoh, Naiwieng 28: Da ka jingthmu ban ai jingtip sha ki paidbah ha kaba ïadei bad ki kam pynroi bad kumjuh ruh ki skhim sorkar bala mang sha ki padibah bad ki shnong bapher bapher, ka Umsning bad ka Umling C&RD Block, mynta ka sngi ki la pynlong ïaka program Hamara Viksit Bharat Sankalp Yatra, ha kaba ka Umsning C&RD Block ka la ioh ban pynlong ha SGSY Hall Umsning bad ka Umling C&RD Block ka la ioh ban pynlong ha iing dorbar hall Dulongnar ha Ri-Bhoi.
Ïa katei ka prokram ha ka shnong Dulongnar la wan ban plie paidbah da ka kong Caralyn Khongwar Additional Secretary Ministry of Rural Development kum ka kongsan kaba la pyllait paidbah ruh ïa ka kali kaba rah ïa ka khubor jong ka “Hamara Viksit Bharat Sankalp Yatra” ha ka jingdon ryngkat u Deputy Commissioner Ri Bhoi u Arpit Upadhyay, Raja Brahma Project Director ka DRDA, u Eric Kevin Dkhar BDO Umling C&RD Block lem bad ki wei kiwei ki ophisar na ki tnad treikam bapher bapher lem bad ki paidbah nongshong shnong.
Ka Viksit Bharat Sankalp Yatra kadei ka sienjam ha kylleng ka Ri ban ai jingtip bad pynkupbor ïa ki briew jong ka Ri shaphang ki skhim ba kongsan jong ka sorkar. Ka thong jong ka VBSY ka dei ban ai jingtip shaphang ki skhim ba kongsan jong ka Sorkar bad ban pynurlong ïa ka jingpyntreikam pura ïa kine ki skhim bad kane ka sienjam ka pynshlur ïa ki paidbah ba kin ïashimbynta ha ka roi ka par jong ka Ri.
Kum ban shu kdew hangne kane ka Yatra la plie paidbah da u Myntri Rangbah ka Ri u Narendra Modi ha ka 15 tarik Naiwieng 2023 ha Khunti, Jharkhand, ka yatra ka dei ban ai jingtip sha ki briew bad ban pynpoi ki jingmyntoi jong ki skhim kum ki lad na ka bynta ka jingkhuid jingsuba, ki jingshakri ha ki kam pisa, ka bording ilektrik, ka jingioh ïa ka tyndong LPG, ki ïingsah ïa ki briew kiba duna jingioh, ka jingshngaiñ ha ka jingioh mar bam, ka bam kaba tei met, ki lad ai jingsumar kiba shngaiñ, ka umbam umdih kaba khuid bad kiwei kiwei ki jingmyntoi ba ki paidbah ki dei ban ioh naka sorkar.
Ha kane ka juh ka sngi ka Umsning C&RD Block ruh ka la pynlong ïa kum kane ka juh ka jingïalang ha kaba u Raja Brama Project Director ka DRDA u la long kum u kongsan bad u la pyllait paidbah ïa ka kali kaba rah ia ka khubor jong ka “Viksit Bharat Sankalp Yatra” haka jingdonlang u BDO ka Umsning u Bah Andrew Myrthong bad kiwei kiwei ki ophisar sorkar.