Shillong, Naiwieng 28 : U General Secretary ka Khun Hynniewtrep National Awakening Movement (KHNAM) u Bah James MA Neng, ula pyntip ba ka KHNAM ka la dep thaw ia ka Election Committee (EC) ba kan ïoh pynkhreh shaid shaid ban jied ïa ki kyrtong na ka bynta ka elekshon MDC ka ban wan.
“Halor ka elekshon MDC, ka seng ka la lum ïa ka jingïalang jong ka Executive Committee bad ka la thaw ïa ka Election Committee ka ban peit ïa ki kyrtong kiba wan aplai tiket na ki constituency bapher bapher” ong u Bah James.
Ula ong, hadien ba ka Election Committee kan aiti ïa ki kyrteng, ka Executive Committee kan sa shong ïa ka jingïalang ban shim ïa ka rai ïano ban ai tiket bad ïano ban ym ai.
“Haduh mynta ngin ym pat lah ban pynpaw ïa ka kyrteng ki kyrtong ba la wan pan ticket bad haduh mynta ki don kumba 8 ngut kiba la pan tiket, hynrei ki la don pat kiba la shu kren lyngba ka phone ïa kaba kim pat ai ïa kano kano ka jingthoh sha ka seng ban pan ïa ka tiket ban ïakhun ïa ka elekshon MDC” ong u General Secretary ka KHNAM.
Ula ong ruh ba ka KHNAM kan sa lum ïa ka jingïalang ban ïakren na ka bynta ka elekshon MP Lok Sabha na Shillong Parliamentary Constituency la kan pynïeng ne kan ym pynïeng kyrtong ha katei ka elekshon.
“Ka Elekshon MP ka long ka kam kaba kham ïar ïa kaba ngi donkam ban ïatai bniah bha bad ka Executive Committee kam pat shim ïa kano kano ka rai bad ka dang buh teng ïa kane ka kam” ong u Bah James.
