Shillong, Kyllalyngkot 15: Ka Slog Warriors bad ka Rising CC ki la ïoh ban khur jingjop ha ki ar tylli ki jingïalehkai hynne ka sngi Balang jong ka lympung Shillong Cricket League ha ka kyrdan Third Division ba la pynïaid da ka Shillong Cricket Association ha madan Urkaliar, Shillong.
Ha ka jingïalehkai kaba nyngkong Slog Warriors ka la pynliem noh ïa ka Youngstar CC da 5 wiket. Ka Slog Warriors ka la jop ïa ka toss bad ailad ïa ka Youngstar ban tied nyngkong.
Haba shimti ïa ka inning ha ka tied, ka Youngstar ka la lah ba kan kamai 101 ron bad hap baroh 10 ngut ki wiket naki 17.2 over. U Md Wahid u la lah ban kamai 52 ron naki 32 bol. Kiba la seisoh ha ka bol na ka Slog Warriors ki long u Sonu Prasad da kaba khur 4 wiket naki 3 over bad shah tied 30 ron, katba u Manivannan u la khur 2 wiket naki 3 over bad ailad tang 9 ron.
Haba beh ïa katei ka thong ki nongtied ka Slog Warriors ki la pyndep tang hapoh 12.5 over ban kynjoh 102 ron bad shah pynhap 5 wiket, u Biswajit Das u la kamai 32 ron naki 21 bol, nangta u Imroz u la tied 26 ron naki 27 bol, kaba la ïarap ïa ka kynhun ban jop da 5 wiket.
ïa ka nam Player of the match la khur da u Sonu Prasad u ba la khur haduh 4 wiket.
Ha ka jingïalehkai kaba bud la sakhi ïa ka Rising CC kaba la pynliem ïa ka United Brothers da 3 wiket. Ka United Brothers ka la jied ban tied nyngkong hadien ba jop ïa ka toss hynrei ki la shah khanglad noh da tang 76 ron naba khyllem baroh 10 wiket ha ka 13.5 over.
U Ravishankar kr Yadav u la kamai 28 ron naki 15 bol, nangta u Rohit kr Singh u la tied 11 ron naki 9 bol. Ki rangkawangbol ka Rising CC kiba la seisoh ha ka bol ki long u Shankar Thakuri (2 over: shah tied 13 ron: khur 3 wiket) bad u Bikash Lama (3.5 over: shah tied 14 ron: khur 2 wiket).
Ka la donkam tang 11.1 over ïa ki nongtied ka Rising ban kynjoh 77 ron bad hap 7 wiket ban khur ïa ka jingjop. U Rahul Sharma u la kamai 33 ron naki 22 bol, hynrei ka namtam ka long sha u Shankar Thakuri, nalor ba u la khur 3 wiket ha ka bol u la lah ruh ban kamai 28 ron naki 20 bol ha ka tied ban khur syndon ïa ka nam Player of the match.
