Ther u khlieh ka Congress ba bud ka VPP ïa ki nuksa ka BJP ban ïalap election da ka niam

0

Shillong, Kyllalyngkot 14 : U Khlieh ka Congress ha kane ka jylla u ma Vincent H Pala mynta ka Sngi Ba-ar u la ther tyngeh ïa ka Voice of the People Party (VPP) namar u la kynnoh ba ka bud ïa ki nuksa jongka BJP ban pynïakhleh milai jaktung ïa ka niam bad ka politik bad ban ïalap election ruh da ka Niam.
“ Kane ka party VPP kaba thymmai ka pyndnkam da ka niam ha ka jingïalap election jongka. Ka don ka jingma kaba khraw ban ïa khleh milai jaktung ïa ka politik bad ka niam. Ka Pakistan ka leh ïa kata, ki Hamas ki leh ïa kata bad ka Seria ruh ki leh kumjuh ki pyndonkam da ka niam ha ka politik hynrei ha kaba kut ki briew kiba pyndonkam da ka niam kum ju neh slem ka jingjop jongki bad kim ju poi sha ka thong kaba bha” ong u ma Pala.U la kren ïa kane sha ki lad pathai khubor hadien ba la wai ka jingïalang pynithuh paidbah ïa ki 18 ngut ki kyrtong jongka Congress ki ban ïakhun ïa ka election MDC sha ka JHADC ka ban long ha ka 21 tarik Rymphang 2025.
“ Lada phi leit sngap ïa ki jingïalang election jongki phin sngew kumba phi don hapoh ka jingïaseng ne sngap ïa u nongkren ne nongïathuh khana. Kumno keiñ kane kan lah ban long ha Meghalaya. Ngi don ki Khristan bad ngi don bun ruh ki bym pat long Khristan bad kumjuh ruh ki Hindu. Kumno ngin pynïakhleh milai jaktung ïa ka niam bad ka politik keiñ?
U la kynnoh shuh shuh da kaba ong “ Kine ki rukom leh ka VPP ki long thik kumba leh ka BJP namar ka BJP ruh ka pyndonkam da ka niam bad da ka jingsngew ïapher jaidbynriew ban wanrah ka jingïapait ïapra”
U la ong donkam ban kiar na kaba ïa pynkhleh lang ïa ka niam bad ka politik. U la ong ruh ba ki paidbah mynta ki la sdang sngewthuh ïa ka buit treikam jongka VPP. “ Mynta ki briew ki la ïohi ba ka jingkob bad ka jingkular jongki kim ïahap satia bad ki kam. Ki kular ban wanrah ka jingkylla ha ka Reservation hynrei shaei kata ka Reservation. Kynmaw ki paidbah kim dei shuh kiba dang bieij” pynkut u ma Pala.

Leave A Reply

Your email address will not be published.