Bteng ka Mawlai ïa ka jingïaid lynti khlem ka namrem ha ka SPL

Shillong, Kyllalyngkot 15: Ka Mawlai SC ka la bteng ban bat ïa ka kyrdan ba hakhlieh duh ha ka miej kheiñ point jong ka OC Blue Shillong Premier League 2024 hadien ba ka la khur pura ïa ki 3 poiñ hadien ka jingïakhun kaba jwat bha pyrshah ïa ka Nongthymmai SC, ha kaba kane ka lahduh ba bat ïa ka burom ka la jop salit da 2-1 kol ha madan First Ground – SSA Stadium, Polo, hynne ka sngi Balang.
Ki kol na ka Mawlai la thep da u Romarius Laban (31’) bad u Brolington Warlarpih (66’P) katba u Rudolf Shadap (58’) u la pynkhih ïa ka shi kol na bynta ka Nongthymmai.
Ka jingjop ka mut ba ka Mawlai ka la ïaid 8 tylli ki jingïalehkai khlem ka namrem bad ka la kamai mynta 22 poiñ. Katba ka Nongthymmai ka dang ïaineh ha ka thup kyrdan shah sloit (relegation zone) da tang 7 poiñ, kaba ïa ryngkat bad ka Langsning FC.
Watla kane ka dei ka jingïalehkai kaba nyngkong ïa u Romarius ban shah kynthup ha ka kynhun sdang (starting lineup) ha ka OC Blue SPL 2024, u la lah pat ban pyndonkam hok ïa ka lad da kaba pynkhih ïa ka kol kaba nyngkong ban buh hakhmat ïa ka Mawlai ha ka kylla step.
Khyndiat minit shuwa kane, ka jingpyrshang jong u Reformer Pale, u wei pat u rangïalehkai ba thymmai ha ka starting XI, hynrei la shah kyntait noh ha u Akash Thapa – rangapkol ka Nongthymmai da kaba kura pynkiar sharud ïa ka bol. Hadien kane u Akash u la ïada ruh ïa ka jingpyrshang thep kol na u Mark Gareth Shabong.
Watla kam shym la ïoh satia ban jop bun tylli ki jingïalehkai kumba ka angnud, hynrei ka Nongthymmai barabor ka la ju ïoh ban pynkhihjar kawei ne ar mynta ka samoi bad ka la ïohlad ban pynïakhaid ha ka 58 minit lyngba u Rudolf.
Hynrei, kam shym la dei ïa ka Nongthymmai ban ïoh khur poiñ na kane ka jingïalehkai hadien ka jingïaknieh bol hapoh phyllaw kol ka la ïalam sha ka penalty, ïa kaba u Brolington ka Mawlai u la thep ha ka 66 minit.
Ka jingïalehkai ka ban wan la pynbeit ha ka sngi Thohdieng hapdeng ka Langsning bad ka Rangdajied United FC ban long ha ka por 2 shiteng mynsngi ha SSA Stadium, Polo.