SHILLONG, Lber 14: Haba ai jingkren ha ka jingïalang bad ki lad pathai khubor shuwa ka jingïalehkai ba khatduh jong ka OC Blue SPL 2024 mynta ka sngi, hapdeng ka Mawlai bad ka Shillong Lajong, u General Secretary jong ka SSA, u Bah Dipshon L Nongbri, u la pyntip ba la khot sngewbha ïa ka kynhun ïalehkai phutbol ki shynrang jong ka Ri India ban wan sha katei ka jingïalehkai.
Ka kynhun ïalehkai jong ka ri ka la wanpoi ha kane ka nongbah hashwa ki ar tylli ki jingïalehkai phutbol bar ri (International Match) ki ban long ha Shillong.
Lah ban kdew hangne ba ka Jawaharlal Nehru Stadium, ha Polo kan ïoh ban pynlong ïa ar tylli ki jingïalehkai phutbol bar ri mynta u Lber.
Ka jingïalehkai kaba nyngkong ka India kan ïakhun pyrshah ïa ka Maldives ba la buh ban long ha ka 19 tarik u Lber, ka ban long ka jingïalehkai paralok kum shi bynta ban pynkhreh ïa ka wat ïakhun ba khatduh lane ka Final Round jong ka AFC Asian Cup 2027 Qualifiers.
Ka jingïalehkai kaba ar kan long pyrshah ïa ka Bangladesh haka 25 tarik u Lber, ka jingïalehkai ba nyngkong jong ka India na bynta ka final Round jong ka AFC Asian Cup 2027 Qualifiers.
