Shillong, Lber 14: Ka kynhun ïalehkai kriket ki kynthei jong ka Shillong Cricket Association ka la jop ïa ka jingïakhun final haka U-15 Girls Inter-District Cricket Tournament 2025 pyrshah ïa ka South West Khasi Hills da 41 ron hynnin ka sngi Palei (13 tarik Lber, 2025) ha Nongstoiñ ban rah ïa ka nam lahduh jong kane ka lympung.
ïa kane ka lympung la pynlong da ka Meghalaya Cricket Association [MCA] bad la pynïaid da ka West Khasi Hills District Cricket Association ha madan ïalehkai jong ka shnong, ha Mawrysyiar.
Ha katei ka jingïalehkai kaba la shah pynthut ha u slap, ka SWKHDCA ka la jop ïa ka jingkynting pisa (toss) bad ka la aiti ïa ka SCA ba kan tied nyngkong. Ki thei ïalehkai jong ka SCA ki la muja bha ha ka tied da kaba lah ban kamai 166/3 na ki 20 ober, ha kaba ka Janvi Kumar Shah ka la lamkhmat da kaba kamai 58 ron na ki 67 tylli ki bol. Nalor ka Janvi Kumar, kiwei pat kiba la seisoh ha ka tied ki long ka Laviola L Mawlong (28 ron na ki 32 bol) bad ka Prisceca Nongpiur (16 ron naki 30 bol).
Haba wanphai ban tied ka SWKHDCA ka la shah pynduna sha ka 9.3 ober namar ka jingshah pynthut jong u slap, katkum ka rukom DLS, ka thong ba la pynkylla thymmai ba ki hap ban beh ka long 116. Hynrei ka SWKHDCA ka la lah ban kynjoh tang 74/7, kaba la pynthikna ïa ka jingjop na bynta ka SCA da 41 ron. Ka Laviola, kaba la kawang ïa ka over kaba nyngkong, ka la khur 2/3, katba ka Prisceca ka la khur 2/17 ha ki 4 over.
Ha kane ka sngi la wan sakhilang ïa ka jingïalehkai da u Bah Rayonald Kharkamni – Honorary Secretary jong ka MCA, Sengnab Momin – MCA Vice-President, Bah Peter Macdonald Kharsawian – MCA Apex Council Member, Bah Lamborful Wanniang – President jong ka Mawrysyiar Youth & Cultural Club (MYCC), Bah Shembor Rani MYCC Secretary, Bah Wanpyntngenbor Lyngdoh Nonglait – President jong ka WKHDCA bad u Bah Mebanphira Swer – WKHDCA General Secretary.
Kiwei pat ki dkhot jong ka WKHDCA ki la donlang ruh, ha ryngkat ki riew rangbah na ki synjuk ïalehkai kriket (district cricket association) bapher bapher ha ki district kiba la sakhi ïa katei ka jingïalehkai kaba itynnad bha. Kane ka lympung ka la ai ka lad kaba paka ïa ki khynnah kynthei ban pyni ïa ka sap jong ki, bad ka jingïalehkai kaba khatduh ka la paw shai ba ka dei ka jingïakhun kaba itynnat wat hapdeng ka jingpynthut jong u slap.
