Mawkyrwat, Lber 14: Kum shibynta jong ka jingaimynsiem na ka bynta ki samla ïalehkai ha ka 6th Meghalaya Game 2025 kaba dang shu dep kaba la long ha Jowai, na ka liang ka South West Khasi Hills District Sports Association (SWKHDSA) ka la ïoh ban pynkup burom ïa ki 90 ngut ki ‘rang bad ki ‘thei ïalehkai kiba la ïoh khusnam ha ki jait jingïalehkai bapher bapher kiba la mih khmat ïa ka South West Khasi Hills District ha ka jingïalang ba la pynlong ha madan Artificial Turf, MDSA, Nonglang, South West Khasi Hills District.
Ka jingpynkup burom mynta ka sngi jong ka SWKHDSA ka kynthup ïa kiba la dep ban ïalehkai ha ka Muaythai, Archery, Cycling, Badminton, Swimming, Kho-Kho Women’s Team, Arm-Wrestling, Weightlifting, Basketball Women’s Team, Football Women’s Team & Athletics.
Ym tang kata, ha kane ka juh hi ka sngi la ïoh ruh ban pyllait paidbah ïa ka kot kaba la ai kyrteng “Ka Rukom pynïaid kam” jong ka South West Khasi Hills District Sports Association ba la pylliat paidbah da u bah Renikton Lyngdoh Tongkhar, MLA ka Mawkyrwat uba la long kum u kongsan.
Haba kren ha ka jingïalang kum u kongsan, u bah Renikton Lyngdoh Tongkhar, MLA ka Mawkyrwat u la pynpaw ka jingsngewkmen watla ka South West Khasi Hills District ka dang dei ka distrik kaba dang rit hynrei ha ka liang jong ka jingïalehkai pat ka la dei kawei na ki distrik kaba la ju pynmih kham bun bad khamtam lei lei ha kane ka 6th Meghalaya Game 2025 kaba dang shu dep ki nongïalehkai leh ha ki jait jingïakhun bapher bapher ka la kot ka jingïoh khusnam haduh 90 ngut.
Namarkata, u la ai ka jingkyntu ïa ki samla ïalehkai ba kin nang kiew irat ha kane ka bynta khnang ba kan long ka jingmyntoi bad jingïoh burom na ka bynta jong ki bad ïa ka dong ka thaiñ baroh kawei.
Haba kren shaphang ka jingdon jong ka South West Khasi Hills District Sports Association (SWKHDSA) kaba dang shu thaw ne pynlong ha kine ki sngi, u la ai jingmut ba ki association bapher bapher nangne shakhmat kin don ka jingïatreilang bad kane ka South West Khasi Hills District Sports Association (SWKHDSA) khnang ba yn lah ban pyntyllun ïa ki kam jong ka jingïalehkai kham shakhmat bad kham janai shuh shuh ban ïa kaba ju long ha ki por ba la dep.
Ha kane ka sngi la donlang u bah D. Syngkon, DSO ka South West Khasi Hills District, u bah I. Lawrynniang, MCS, Block Development Officer (BDO) jong ka C&RD Mawkyrwat Block, lem bad ki nongkitkam ka South West Khasi Hills District Sports Association (SWKHDSA) kynthup ïa u bah H S Diengdoh, President bad u bah Forwardman Nongrem, General Secretary lem ruh ki nongkitkam jong ki 16 tylli ki Association kata MDSA (Football, Archery & Athletics), ka Swimming, ka Volleyball, ka Cycling, ka Badminton, ka Cricket, Arm Wrestling, ka Kho-Kho, ka Basketball, ka Handball, ka Softball, ka Rock Climbing & Mountaineering, ka Muay-Thai, ka Weightlifting, ka Carrom Board & Pool, bad ka Table Tennis.
