SOHRA, Lber 14: Ka NIT Meghalaya bad ka Combine SHG ki la jop ïa la ki jong ki jong ki jingïakhun ha ka sngi ba san (Day:5) jong ka Inter Office Cum Corporate League T20 Cricket Tournament 2025, ba la pynlong da ka East Khasi Hills Cricket Association [EKHCA], ha Sohra, hynne ka sngi Thohdieng.
Ka NIT Meghalaya ka la jop da 4 wiket ïa ka PHE Sohra Divission ha ka jingïalehkai ba nyngkong, shuwa ba ka Combine SHG kan pynliem da 74 ron ïa ka Sohra Post Office.
Ka jingïalehkai ba nyngkong la sakhi ïa ka PHE Sohra Division kaba la rai ban tied nyngkong hadien ba jop ïa ka jingkynting pisa (toss) hynrei ka la lah ban kamai tang 66/6 naki 8 ober ba la mang. U Ricky Surong u la long uba kongsan ha ka tied da kaba kamai 18 ron naki 15 bol. Na ka liang ki rangkawang bol, u Vickyson Lambert War u la khur 2/10 naki 2 ober.
Watla u Rahnam Nongspung u la khur 4/12 naki 3 ober hynrei ka NIT Meghalaya ka la pyndep ban kynjoh ïa ka thong ba ka donkam da kaba hap tang 6 wiket, kata ban kamai 69 ron naki 7.5 ober ban jop ïa ka jingïakhun da 4 wiket. U Vickyson Lambert War u la lamkhmat ha ka tied lyngba ki 22 ron ba u la kamai, bad u la khur syndon ïa ka nam Player of the Match.
Haba phai sha ka jingïalehkai kaba bud, hadien ba jop ïa ka jingkynting pisa (toss) ka Combine SHG ka la shimti ban tied nyngkong bad ka la lah ban kamai 151/1 haki 12 ober. U Banphira Basaiawmoit u la long uba kongsan tam da kaba kamai 59 ron naki 34 bol, katba u Daryll Donald Nongbri u la khur 1/19 naki 3 ober ha ka bowling.
Haba pyrshang jubab ka Sohra Post Office ka la ïohlad ban kamai tang 77/4 haki 12 ober ba la mang, watla u Michael Roy Shongdiar u la kamai 33 ron naki 31 bol hynrei ka kynhun ka dang sahdien sa 74 ron ban kynjoh ïa ka thong. U Kevin Diengdoh u la khur 1/10 naki 3 ober, bad ïa ka nam Player of the Match la khur da u Banphira Basaiawmoit.
