Shillong, K’Lyngkot : U Pastor L.D Nongsiej incharge ka Balang Presbyterian Mawlai Nongkwar u la pynpaw ba ki khmih lynti ba haduh kumba 10,000 ngut ki paid riewngeit kin wan sha kane ka jingïaseng presbytery ka ban long ha ka 17,18 bad 19 tarik u Rymphang ha madan Lummawnei, Mawlai Umthlong.
Na ka liang u Pastor u la pynpaw ïa kane ha ka jingïakynduh ïa u MLA ka Mawlai u Bah PT Sawkmie ha ka 2 tarik mynta u bnai ha ka jingdon ryngkat ki nongïalam ka Balang Presbyterian Mawlai Nongkwar, ki riew rangbah, ki longkmie bad kiwei kiwei.
U Pastor u la pynpaw ruh ba u ju ïohi ba ki jingai ba ai ki nongmihkhmat, ki phuh ki phieng tang katto katne ka haba sdang bad ki duh noh tang khyndiat por, kumta u kyrpad ïa ki paidbah ba kin sumar sukher ïa ki, ban shim ba ki dei ki mar jong ki.Ha ka juh ka por u kitbok bad kyrmen ruh ba u Bah PT Sawkmie un wanphai biang kum u nongmihkhmat ka Mawlai Konstitwensi.
Katba na ka liang u Bah Sawkmie u la pynpaw ba u wan ban ai mynsiem ban ïa don ryngkat bad ka Balang ha kaba ïa dei bad kane ka jingïaseng na ka bynta ki jingpynkhreh jong ka.
Nalor kata ula ong ruh ba haba long ka jingïaseng ka jingkyrkhu ka wan bad ka jingkyrkhu banyngkong ka long ba ka dong Lummawnei kan ïoh ïa ki street light lyngba ki solar light ban pynïeng ha ki surok dong, bad u la ïathuh ruh ba dang shen u dang shu dep ai street light ïa ka shnong Umjajew, kaba la shai mynta haba ïaid ha ka por mynmiet.
Ha kajuh ka por u pyntip ruh sha ki paidbah nongshong shnong ka dong Lummawnei ba kin sa shna noh ïa ka jaka Saitjaiñ, kaba la slem khyndiat na ka daw ba ïa pynbeit kam bad ki trai jaka.U pyntip ruh ba kin sa shna noh ruh ïa ka lynti iaid kjat (Footpath) hapoh kane ka dong.
Shuh shuh u bah Sawkmie u pynpaw ruh ba un ïai don ryngkat bad ka balang na ka bynta kane ka jingïaseng bad u pynpaw ruh ba kum u nongmihkhmat u ju don bynta ruh bad kiwei de ki balang haba ki donkam ïa u.
Ha kane ka sngi la ïoh ruh ka jingkren na u tymmanbasan E. E. S Lamare, na secretary dong Lummawnei bah Hamles Mylliem Umlong bad na bah Iabeit Khongwar ha ka jingdon ryngkat u rangbah dong Lummawnei bah Habamut Mylliem Umlong, ki riew rangbah, ki longkmie bad kiwei kiwei.
