Khluit ka Ïingdorbar KHADC haba ym lah jubab ka EM Law ïa ki kyndon jong ki Court fee

Shillong Jylliew 19: Ka dorbar lyiur jong ka KHADC ha ka sngi Thohdieng ka la khluit tar hadien ba ki MDC ka Liang Ïatei kim hun satia ïa ka jubab jong ka Executive Member kaba khmih ïa ka tnat Law ka Kong Deity H Majaw haba ka la pynpaw hapoh ka Ïingdorbar Thaw Aiñ KHADC ba kam lah shuh ban jubab ïa ki jingkylli kiba la mih haba ïadei bad ka jingsiew ïa ki Succession Fee, kaba ki la kynnoh ba ka la dei ka jingsiew kaba rem bad kaba ktah ïa ka jingim jong ki Khasi naba kidei ki jaitbynriew rit paid.
Na ka liang ki MDC ka Liang Ïatei kiba kynthup naduh u MDC ka Laban-Mawprem u Bah Ricky Shullai, u MDC ka Sohra uba dei ruh u nongïalam ka Liang Ïatei, u MDC ka Shella bad kumjuh ruh ïa ka jingkylli ba la wanrah da u MDC ka Sohïong u Bah S L Thabah.
Ki jingkylli ba la wanrah ki long la ka ïingbishar ka shim court fee halor ki mukotduma ban kam ïa ki nongkynti ba hiar pateng bad ki la kylli ruh la ka don ne em ka aiñ ka Council kaba shah ïa kane, ne la ka ïingbishar ka la pynlait ne em na ka jingdonkam ban siew ïa ka stamp duty naduh u snem 1952 bad la ka Indian Court fee Act ka treikam hapoh KHADC.
Halor kine haba jubab ka EM ka la ïathuh ba hapoh ka Khasi Hills Autonomous District Council, Court Fee Rules, 1976 bad ka Court Fees (Meghalaya Ammendment) Act, 1993.
Halor ka jingkylli ka ki ïingbishar ki lait ban siew ïa ka stamp duty naduh u snem 1952, ka EM ka ïathuh ba kane kam dei hynrei kim lait na ka stamp duty.
Haba ïadei bad ka jingkylli ba naduh mynno ba la shim ïa ki stamp fee ne court fee, na ka liang ka EM ka la ong ba naduh u snem 1953 ba sien shong ba nyngkong jong u nongbishar ba nyngkong bad ïathuh ruh ba ka Indian Court fee Act ka treikam hapoh ki District Council Court.
Haba ki MDC ki la kylli ba ha kano ka nongrim ba la shim ïa ki Succession Fee kaba hapoh T. 1 lak da 2% bad T. 2 lak shaneng da 3% bad halor kiei ki kyndon ne act jong ka Counci bad hangno la kdew ïa kine ki fee da ka khyrnit kaba hynriew, na ka liang ka EM ka ïathuh ba la shim ïa kine ki jingsiew lyngba ka Executive Order ba la pynmih ha u snem 2024.
Bad dei hangne ba ka EM ka la jubab shi jubab ïa katei ka Order ba la mih ka jingkhluit naba ka EM ruh kam lah ban ai ïa ka jubab kaba pynhun ïa baroh bad pynpaw ruh ba kam lah satia ban jubab ïa kitei ki jingkylli.
Halor kane ki MDC ka Liang Ïatei ki la kynnoh ruh ba ka tnat ka la pyntreikam ïa ka order kaba la dep ïap lypa, kumta ki la kyntu ïa ka EM ban pynduh noh shwa ia katei ka Order 2024 bad ban khmih bniah biang ïa ki jingduna katei ka Order bad ban wanrah ruh da ka Ammendment hapoh ka Ïingdorbar khnang ba kan long syndon da ka aiñ.
Na ka liang ka EM haba pynpaw ba ka jingshim ïa ki court fee ka la neh sah katjuh naduh u snem 1952 bad dei ha u snem 2024 ban la pynkylla noh lyngba ka Executive Order ban kham pynheh noh naba ka pynpaw ba kan ym don jingeh ïa kito kiba don ki nongkynti kiba da ki klur ban siew ïa ki court fee kiba dang long kiba duna bad kiba dang lah ruh ban pyrkhat ïa ka jingpynduna (concession) na ka dor ba la buh.
Shuh shuh ka EM ka la pdiang ruh ïa ki jingai jingmut jong ki MDC ka Liang Ïatei ban khmih bniah biang ïa katei executive order bad ban wanrah pat ïa ki ammendment hapoh ka Ïingdorbar Thaw Aiñ ka ban sa long ha kiwei pat ki por.