Ïaroh ka Nirmala ïa ka jingitynnad ki jaka bad jinglong kyrpang jaitbynriew ha Meghalaya

Nongpoh, Jylliew 19: Ka Nirmala Sitharaman kaba dei ka Myntri jong ka sorkar pdeng ba dei peit ïa ka tnad Finance bad Corporate Affairs, ka la pynpaw ka jingsngew tynnad bad sngew kmen ka mynsiem ban iuhkjat ha kane ka jylla Meghalaya kaba dap da ka jingitynnad ba ka mei mariang kala kyrkhu kyrpang.
Haba kren ha ka jingïalang plie ïaka Organic Spice Processing Plant ba heh tam ha ka thaiñ Shatei Lam Mihngi ha Lumdaitkhla, Bhoirymbong, ka Nirmala ka la ong ba ka dap da ka jingsngewkmen ban don ha Ri-Bhoi ka jaka ba sboh tam ka jylla Meghalaya, naduh ka jinglong kyrpang ka ktien ka thylliej, ka mei mariang bad ki sawdong sawkun ka jylla Meghalaya ka dei shisha kaba u Blei u la thaw kyrpang.
“Lada ka jylla Meghalaya ka kiew, ka thaiñ Shatei Lam Mihngi kan kiew,” la ong ka Nirmala da kaba bynrap ruh ba kane ka jylla bad kiwei ki jylla ka thaiñ Shatei Lam Mihngi kin long ki nuksa bad ki nonglam lynti ïa kiwei ki jylla haka ri ha kaba ïadei bad ka roi ka par khamtam ha ka rep ka riang.
Namar ka jingsngewtynnad ïa ka ktien Khasi bad Garo na ka liang ka Nirmala ka la pyrshang ruh ban pashat ki synboh pyrkhat haka ktien Khasi bad Garo watla kam beit bha ka rukom kren bad ka rukom kynnoh hynrei ka la ïoh ka jingïaroh ïa ka jingieid kyrpang jong ka ïa ka jylla bad ki jaitbynriew ba don hapoh kane ka jylla.
Lyngba kane ka kam pynroi ba la plie paidbah ha kane ka sngi ka Nirmala ka la ong ruh ba kane ka dei ka jaka saiñ ïaki mar rep ba nyngkong ba la ithuh ha ka thaiñ Shatei Lam Mihngi hapoh ka National Program for Organic Production and EU Organic Standards ban shalan bad pynïaid ïew beit mardor sha ki ri ka jylla bad kumjuh ha ri India.
Nalor kine ki jingitynnad ka jylla Meghalaya ba ka Nirmala ka la ïaroh ka la ong ruh ba kane kam dei shuh ka sien ba nyngkong ba ka wan ban ïuhkjat bad ïapbiej ïa ki jaka bad ki jaitbynriew bad shuh shuh ka jingithuh bad paw u shynrai Lakadong bad kiwei kiwei ki mar rep ka la nang rah shuh shuh ïa ka burom jong ka jylla.