Shillong, Nohprah, 02: Ka Ministry of Home Affairs (MHA) jong ka Sorkar Pdeng kam shym la ai ïa ka jubab kaba shai ha kaba ïadei bad ka jingdawa ban pyntreikam noh ïa ka Inner Line Permit ha kane ka jylla Meghalaya.
Ka Sorkar Jylla ha u snem 2020 ka la phah sha ka Sorkar Pdeng ïa ka Resolution ban pyntreikam ïa ka Inner Line Permit ha kane ka jylla Meghalaya ïa kaba la ai jingmynjur da ka Ingdorbar Thawaiñ ka Jylla ha u Nohprah, 2019.
Dang shen ka Hynñiewtrep Achik National Movement (HANM) ka la pynlong da ka jingïakhih bajaijai ha Jantar Mantar, New Delhi ban dawa ïa ka Sorkar Pdeng ba kan ai jingmynjur ban pyntreikam noh ïa ka Inner Line Permit (ILP), ban pynrung ïa ka ktien Khasi bad Garo ha ka Khyrnit Baphra bad ban ïapynbeit noh ïa u pud u sam hapdeng ka Jylla Meghalaya bad Assam.
Ha ka jingïakren bad ki lad pathai khubor ha ka sngi Saitjaiñ hadien ba la wai ka jingïalang jong ka Central Executive Committee (CEC) u President ka seng u Bah Lamphrang Kharbani u la ong ba ka Ministry of Home Affairs ka la phah ïa ka jubab sha ka seng ha ka 7 tarik mynta u bnai halor ki ki lai tylli ki mat jingdawa jong ka seng.
U la ïathuh ba ka Ministry of Home Affairs kam shym la kren shai ha kaba ïadei bad ka mat jingdawa ban pyntreikam ïa ka Inner Line Permit (ILP) hapoh Meghalaya.
“Kam (MHA) shym ong haoid lane em halor kane ka bynta,” u la ong.
Ha kaba ïadei bad ka jingdawa ban thaw ïa ka Boundary Commission, u Bah Kharbani u la ïathuh ba ka MHA ka la phah da ka jingthoh sha ka CS Division kaba khmih ïa ka jingïapynbeit pud ïa baroh ki jylla kiba don hapoh pud u sam jong ka thaiñ Shatei Lammihngi ka ri India.
“Ka CS Division ka hap hapoh ka jingpeit ïa ka jingïapynbeit pud,” u la ong.
“Ka seng kan ym shongthait ban buddien halor kitei ki lai tylli ki mat tad haduh ban da poi sha ka thong jong ka jingjop,” u la bynrap.
“Ka jingai jubab jong ka MHA ïa ki lai tylli ki jingkylli jong ka seng (halor ka ILP, ka ktien Khasi bad Garo, ka jingïapynbeit pud) ka dei ka jingburom ïa ka ri bad ka jaidbynriew bad ïa ki paidbah ka Jylla Meghalaya,” la pynpaw u Bah Kharbani.
Halor ka jingdawa ban pynrung ïa ka Ktien Khasi bad Garo ha ka Khyrnit Baphra, u Bah Kharbani ula ong, “ka MHA ka kren ba ki jingpynsngew jong ngi lyngba ka jingaiti ïa ki dorkhas sha ki Myntri Sorkar Pdeng ka long ba ka hap ban pdiang ïa ki jingpynsngew tangba kam shym la kren eiei pat da kaba shai.”
“Ngin ym shongthait bad ngin ym shong kli kti hynrei ngin ap beit ïa kaei kaba ka Sorkar thymmai ha Delhi kan pynpaw pyrthei. Shwa kata ruh, kumba ngi la smai bad ngi la rai kum ki nongïalam, ngi hap ban ïakren bad ka Sorkar Meghalaya,” u la ong.
“Ngi kwah ba ki nongsynshar jong ngi, kin hap ban pynbeit ïa ki rukom speldak jong ka ktien Khasi. Ka Department of Khasi jong ka skulbah NEHU ka hap ban shimkhia ruh halor kane ka bynta,” ula ong.
