New Delhi, Nohprah 02 : Ka jingñiew vote ha ki saw tylli ki jylla, kata ha Madhya Pradesh, Chhattisgarh, Rajasthan bad Telangana kan long mynta ka sngi u Blei ka 03tarik Nohprah, hadien ba ka jingthep vote ha kitei ki jylla, kynthup ïa ka Mizoram, ka la kut noh ha ka 30tarik mynta u bnai.
Lah ban kdew hangne ba ka jingniew vote pat ha Mizoram kan long ha ka sngi Nyngkong, 04tarik Nohprahhadien ba bun ki kynhun ki la pynpaw ïa ka jingpyrshah kaba jur ban ñiew vote ha ka sngi U Blei.
Ka jingthep vote na bynta ki 40 constituency ha Mizoram ka la dep ha ka 07tarik Naiwieng, katba na bynta ki 90 tylli ki constituency ha Chhattisgarh pat la pynlong ha ki ar bynta, kata ha ka 07tarik Naiwieng bad 30tarik. Ka elekshon na bynta ban jied ïa ki nongmihkhmat ba thymmai ha ki 230 tylli ki constituency ha Madhya Pradesh pat ka la long ha ka 17tarik Naiwieng, ki nongthep vote ha ki 199 tylli na ki 200 tylli ki constituency ha Rajasthan ki la leit ban thep vote ha ka 25tarik Naiwieng kumjuh ruh ha Telangana na bynta ki 119 seat ka la long ha ka 30tarik Naiwieng.
Madhya Pradesh : Ka jingdon ki nongthep vote ha Madhya Pradesh katkum ka thup thep vote ka la kot sha ka 5,61,36,229 ngut (5.61klur tam). Kumban shu pynkynmaw, u Shivraj Singh Chauhan jong ka BJP u la dei u Myntri Rangbah katei ka jylla naduh u snem 2020. Shwa kane, u la bat teng ruh kum u Myntri Rangbah ka jylla naduh u snem 2005 haduh 2008 bad na 2008 sha u 2013 bad na 2013 haduh 2018.
Katto katne ki kyrtong ba kham paw ha kane ka elekshon na katei ka jylla ki kynthup ïa u Shivraj Singh Chouhan (BJP) na Budhni, Kamal Nath (Congress) na Chhindwara, Ajay Arjun Singh (Congress) na Churhat, Jaivardhan Singh (Congress) na Raghogarh, Kailash Vijayvargiya (BJP) na Indore-1, Govind Singh Rajput (BJP) na Surkhi, Prahlad Singh Patel (BJP) na Narsingpur, Narendra Singh Tomar (BJP) na Dimani bad Faggan Singh Kulaste (BJP) na Niwas.
Rajasthan : Ki nongthep vote ha kane ka jylla katkum ka thup thep vote ka la kot sha ka 5,26,80,545. Ïa ka bor synshar ha katei ka jylla la ïalam da ka Congress hapoh ka jingïalam jong u Ashok Gehlot naduh u snem 2018. Utei u rangbah u la bat teng ruh kum u Myntri Rangbah jong ka jylla naduh u snem 1998 haduh 2003 bad hadien kane naduh 2008 haduh 2013.
Katto katne ngut ki kyrtong ba kham paw ha kane ka jylla ki kynthup ïa u
Ashok Gehlot (Congress) na Sardarpura, Vasundhara Raje Scindia (BJP) na Jhalrapatan, Sachin Pilot (Congress) na Tonk, Rajyavardhan Singh Rathore (BJP) na Jhotwara, Baba Balaknath Yogi (BJP) na Tijara, Vishvendra Singh (Congress) na Deeg-Kumher, CP Joshi (Congress) na Nathdwara, Rajendra Singh Rathore (BJP) na Taranagar bad u Hanuman Beniwal (RLP) na Khinwsar.
Chhattisgarh : Ki nongthep vote ha kane ka jylla ki la kot sha ka 2,03,80,079 ngut katkum ka thup thep vote. Katei ka jyla baroh shi katta la ïalam da u Bhupesh Baghel jong ka Congress naduh u snem 2018. Kumban shu pynkynmaw u Raman Singh ka BJP u la dei uwei pat u kyrtong ba hakhmat ha kane ka elekshon namar u la bat teng ruh kum u Myntri Rangbah naduh u snem 2003 haduh 2018.
Katto katne ki kyrtong ba kham paw ha kane ka jylla ki kynthup ïa u
Bhupesh Baghel (Congress) na Patan, Raman Singh (BJP) na Rajnandgaon, Vijay Baghel (BJP) na Patan, Gomti Sai (BJP) na Pathalgaon, Renuka Singh Saruta (BJP) na Bharatpur-Sonhat, TS Singh Deo (Congress) na Ambikapur, Arun Sao (BJP) na Lormi, Brijmohan Agrawal (BJP) na Raipur City South, Tamradhwaj Sahu (Congress) na Durg Gramin, Charan Das Mahant (Congress) na Sakti bad Deepak Baij (Congress) na Chitrakot.
Telangana : Ha kane ka jylla kaba don 3,17,32,727 ngut ïa ka sorkar la lamkhamt da u nongmihkhmat na ka Bharat Rashtra Samithi’s (BRS) u K Chandrasekhar Rao kum u Myntri Rangbah naduh u snem 2014. Une u nongmihkhmat u la jop biang ha u snem 2018 da ka jingjop kaba donburom.
Ki kyrtong ba kham paw ha kane ka elekshon na Telangana ki kynthup ïa u K Chandrasekhar Rao (BRS) na Kamareddy bad Gajwel, Anumula Revanth Reddy (Congress) na Kodangal bad Kamareddy, Etela Rajender (BJP) na Gajwel bad Huzurabad, Nalamada Uttam Kumar Reddy (Congress) na Huzurnagar, Akbaruddin Owaisi (AIMIM) na Chandrayangutta, Komatireddy Raj Gopal Reddy (Congress) na Munugode, KT Rama Rao (BRS) na Sircilla, Bandi Sanjay Kumar (BJP) na Karimnagar bad Mohammad Azharuddin (Congress) na Jubilee Hills.
Mizoram : Ka jingdon ki nongthep vote ha kane ka jylla ka la kot sha ka 8,56,868 ngut. Ïa katei ka jylla la ïalam da u MLA ka Mizo National Front’s (MNF) u Zoramthanga kum u Myntri Rangbah naduh u snem 2018. U la bat teng ruh kum u Myntri Rangbah naduh u snem 1998 haduh 2008.
Ki kyrtong ba kham paw ki kynthup ïa u Zoramthanga (MNF) na Aizawl East-I, Tawnluia (MNF) na Tuichang, Vanlalsailova (BJP) na Dampa, Lalduhoma (ZPM) na Serchhip, R Lalthangliana (MNF) na South Tuipui, Zodintluanga Ralte (Congress) na Thorang bad Lalsawta (Congress) na Aizawl West-III.
