Da ki jingkylli pynkhreh ki nongrep ïa ka Sorkar ha ka Farmer’s Parliament

Shillong, Nohprah, 02: Ki nongrep kiba la pynkhreh ban ïashim bynta ha ka Meghalaya Farmer’s Parliament ka ban sa long ha ka 4 tarik bad 5 tarik Nohprah ki la pynkhreh lypa ïa ki jingkylli ba kin sa buh hakhmat jong ki tnat treikam bapher bapher jong ka Sorkar Jylla.
Ha kane ka sngi, ka Hill Farmer Union (HFU) kan sa rakhe ruh ïa ka sngi kyrpang jong ki nongrep ne ka Meghalaya Farmer’s Day.
U President ka HFU, Bah Commander Shangpliang ha ka jingïakren bad ki lad pathai khubor u la ïathuh ba u Myntri Rangbah ka Jylla u Conrad Kongkal Sangma, u Myntri ka tnat Animal Husbandry and Veterinary u Bah Alexander L. Hek, bad ka Myntri ka Rep ka Riang ka Dr. Ampareen Lyngdoh kin sa ïashim bynta lang ha ka sngi plie ïa kane ka dorbar ki nongrep ka ban sa long ha nongbah Shillong.
“Kin sa don ki jingbatai na ki tnat treikam bapher bapher halor ki skhim ba la ai jingmyntoi ïa ki nongrep,kata, na ka tnat Agriculture, Horticulture, Fisheries, Veterinary bad khamtam eh ïa ki mishon bapher bapher ba ka Sorkar ka la wanrah na ka bynta ki nongrep,” la ïathuh u Bah Shangpliang.
Kan sa don ruh ka kynta kylli jingkylli kumba long hapoh ka Ingdorbar Thawaiñ ba ki nongrep na manla kawei pa kawei ka Block ki ladep pynkhreh lypa ïa kiba ka Union ka ladep phah sha ki tnat treikam ka Sorkar ba kin ai jubab ha ka dorbar.
Haba kylli, u General Secretary jong ka HFU, Bah Alfondbirth Kharsyntiew u la ong, ki jingkylli ki kynthup, “ïa ka jingbym biang ki symbai ba ka tnat ka ju pynpoi sha ki nongrep. Ka jingpynpoi ïa u symbai lyngba ki Block ka slem palat namarba tengteng ka por thung kam dei shuh, katba ki symbai ki dang wan poi.”
“Ka jingpynslem jong ka Sorkar, naduh u snem 2021 haduh 2023, ba ki nongrep kim pat ïoh ïa ka bailutksan halor ka jingshah pynjot jong ki marrep ha ki bor jong ka mariang,” u la bynrap.
Shuh shuh u la ïathuh ba ki nongrep ki la pynpaw ruh ha ka jingkylli halor ka jingsngewkhia ba ki don ki khynnah ba la pep skul shiteng por.
“Ki nongrep ki la pan jubab na ka tnat Pule Puthi, kaei ka thong jong ka Sorkar ban pynduna ïa ka jingpep skul shiteng por ki khynnah ha ki shnong jong ki bad bynrap, “na East Jaiñtia Hills, ki nongrep ki kwah ban buh ïa ka Free Coaching Centre khnang ba ki khun jong ki nongrep kin ïoh ban pyntbit ïalade ha ki eksmin bapher bapher kum ka JEE, NEET bad kiwei kiwei namarba ki khun jong ki nongrep ki don ruh kiba thrang ban ïakhun wat ïa ka eksamin MPSC.
“Kawei ka jingkylli kaba mih ka long ruh balei ka Sorkar haduh mynta kam lah ban pynduh ïa ka jingot kilo,” la ïathuh u Bah Kharsyntiew.