Jowai, Nohprah 2 : Ha ka Sngi Thohdieng u President jong ka party HSPDP u bah K P Pangniang u la pynskhem ïa u Ma Wanshwa Nongtdu kum u president ka party jong ka Rilum Jaintia bad ïa ki san ngut ki nongkit kam kiba ha khmat jong ka party, u bah One Way Talang kum u General Secretary.
U bah Dayschbornemi Talang kum u Secretary ka jong ka West Jaintia Hills District, bah Wonly Bareh Secretary ka East Jaintia Hills District bad u bah Sucil Dkhar kum u nongbat ïa ka pla pisa jong ka party, ïa kane ka jingpynskhem la pynlong ha Orchid ha Thadlaskein West Jaintia Hills District.
Ha ka jignkren jong u President ban pynskhem ïa ki nongkitkam jong ka party u bah K.P Pangniang u la ong ba, ïa ka Party HSPDP la seng ha u snem 1968 shuwa ban ïoh ïa ka jylla Meghalaya bad kane ka party ka dang ïai bteng ban bat ïa la ka nongrim ban ïada ïa ka jaidbynriew.
Ka nongrim kaba ka party HSPDP ka ïeng ka long ha ki lai tylli ki nongrim kumba long ki Mawbyrsiew, ban pynneh pynsah, ban ïada bad ban pynbha, ka party ka ka ïeng halor kine ki lai tylli ki nongrim haduh mynta, ki bun bah kiba la mih na ka party hynrei ka party kam shym la kylla jutang na ki nongrim kiba ka ïeng naduh ba sdang haduh mynta la 55 snem.
U President ula pynkynmaw ba bun bah ki nongïalam na Rilum Jaintia ki la jop na ka party HSPDP, u bah Onward L Nongtdu bam kwai ha dwar u blei bad kiwei kiwei, ki la don san ngut kiba la jop MLA bad 13 ngut kum ki MDC kiba la jop na ka party HSPDP, kumta ka party kam dei shuh kaba thymmai.
Ha ka jingkren u bah Shakliar Warjri MLA jong ka party bad u myntri ka sorkar jylla ba dei peit ïa ka tnad ïalekai bad kiwei kiwei, u la pynpaw ïa ka jingsngew kmen ka jong u ban ïohi ba mynta ka sngi la lah ban pynurlong ban ïoh ban plie ïa ka jingtreikam jong ka party HSPDP ha Rilum Jaintia.
Na ka liang jong u bah Shakliar u la kyntu ïa ki dkhot jong ka party kiba la wan ban pynïasoh sha ka party mynta ka sngi ba kin long kiba ïa treilang na ka bynta ban kyntiew ïa ka ri bad ka jaidbynriew ha baroh ki liang, kane ka long tang ka jingsdang bad nangne sha khmat kin dang ïa teilang ha ki ba bun ki liang.
Ha kane ka sngi kiwei kiba la kren ha ka jingïalang ban pynskhem ia ki nongkit kam ki long u bah Panborlang Ryntathiang General Secretary ka party, bah Starfing Pdahkasiej nongkit kam party bad u bah Sucil Dkhar. ïa ka jingïalang la pynïaid da u Ma Wanshwa Nongtdu haka jingïadon lang kan kot spah ngut ki briew kiba la wan ban pynïasoh sha ka party.
