Shillong, Nohprah, 02: U Bah George B. Lyngdoh ha ka sngi Saitjaiñ u la resaiñ noh kum u Vice President jong ka Trinamool Congress da kaba aidaw, ‘ba ka dei ka rai shimet’
U Bah George u dei uwei napdeng ki 12 ki MLA ka seng Congress kiba la pynïasoh bad ka TMC ha u snem 2021, bad long ruh ka party kaba khlaiñ ha ka Liang Pyrshah jong ka Iingdorbar Thawaiñ ka Jylla. U Bah George u la ïakhun ïa ka elekshon MLA kaba dang shu dep long shen mynta u snem na ka tiket jong ka TMC na Umroi bad u la shah rem.
“Nga phah ïa ka shithi iehnohkam kum u Vice-President, TMC Meghalaya bad kum u President jong ka Umroi TMC Block Committee naduh kane ka khyllipmat,” ong u Bah Goerge ha ka shithi iehnohkam ba u la phah sha u State President jong ka Party u Bah Charles Pyngrope.
“Ki snem ba la leit noh hapoh ka jingïalam bad ka jingkdew lynti jong phi ki la long shisha ki jingïaid lynti kiba kordor. Ma phi bad ki para nongïalam phi la long ki nongkdew lynti ïa nga, bad ïa kito kiba ju don ryngkat ban tbeh jingshai kumno ban pynkylla ïa ki jingeh sha ki jingjop bad ïa ki jyrwit jyrwat sha ki kabu,” ula ong.
U la ai khublei ruh ïa ki nongïalam bad ïa ki dkhot jong ka party kiba katkum ka jingshem jong u,ki la long ki nongïalam lynti bad ki nongkyrshan ha kiba bun ki liang ban ai ïa ka jingshakri sha ki paidbah nongshong shnong jong ka jylla.
“Nga kyrmen ba ha ki sngi ki ban nang wan, ngi dang ïai bteng ban ïasam jingmut, khamtam ïa kito kiba pynmyntoi ïa ki nongshong shnong jong ngi,”u la ong.
