Shillong, Nohprah 03: Ka kynhun ki rangïalehkai kriket Under -19 ka Meghalaya ka la ïoh ban kyntiew namjop kaba nyngkong ha ka lympung lehkai jong ka Cooch Behar Trophy pyrshah ïa ka Sikkim, da kaba jop lyngba ar wicket.
Ka jingïakhun hapdeng kine ki ar kynhun ka la sdang naduh ka sngi Thohdieng ha Rangpo kaba ha Sikkim. Kumban shu pynkynmaw, ka Meghalaya ka la shah rem ha baroh ar sien ki jingïakhun kiba ladep hala ïing bad ka kynhun ka la angnud ban ïoh khur ïa ka namjop.
Na ka liang jong ka Sikkim, ka la jop ïa ka jingkynting ha ka sngi ïakhun ba nyngkong bad jied ban tied shuwa. Ki la lah ban buh thong da 183 ron shuwa ban shah pynhap baroh ha ka inning ba nyngkong bad lamkhmat da 38 ron hadien ba ka Meghalaya ka la kynjoh tang sha ka 145/10 haba beh ïa ka ron. Hynrei, ka jinglah jong ki rangkawangbol ka Meghalaya ban khanglad ïa ka Sikkim da tang 139 ron ha ka inning kaba ar, ka la ïarap ïa ka Meghalaya kaba la kynjoh haduh 178 ron ban jop, bad pynsah sa ar wicket ha kti.
U rangkawangbol Pace jong ka kynhun, u Shavian Blah u la long ka jingeh ïa ki rangtied ka Sikkim ha kaba u la khur 4/69 naki 19 over. U Kishlay Vishlux (2/24 naki 6 over) bad u Charm Marbaniang (2/30 naki 6) ki la ïoh ban khur mar 2 wicket, katba u Banialam Mylliemngap (1/12 na ki 6) lem bad u Angkit Tamang (1/32 naki 9) ki la ïoh pynhap mar u wei.
Ki la don hynriew ngut ki rangtied ka Meghalaya ki la ïoh ban sdang nakhmat hynrei ka ron kaba hehduh napdeng kitei ka long 46 ron kaba la ïoh da u Pushkar Raj Singh hynrei u khlem shym la lah ban kyntiew shuh. Napdeng ki rangkawangbol ka Sikkim u Siddharth u la long ka jingma ïa ki player ka Meghalaya, bad u ba la khur haduh 5/27 kaba la pynlong ïa ka Meghalaya ban hap baroh ki wicket da tang 145 ron.
Hadien ba lamkhmat ïa ka inning kaba nyngkong, ka Sikkim ka la mad jingeh ha ka inning kaba ar bad tang lai ngut ki player kiba la kynjoh sha ka phew ron, bad ka ron kaba hehduh ka dei na u Siddharth 40 ron. Ka Sikkim ka la shah pynduna da 76/8 hynrei ka jingbymlah jong ka Meghalaya ban khylliap ïa ka inning, ka la ailad ïa ka Sikkim ban kyntiew sa 63 ron shuwa ban hap baroh ki wicket.
Ha kane ka kynti, u Angkit u la khur 3/20 naki 9 over, katba u Avinash Rai (2/14 naki 11), Kishlay (2/24 naki 11) bad u Charm (2/34 naki 18) ki la ïoh ban khur mar 2 wicket.
Haba kheiñlang, ka Meghala ka donkam 178 ron ban jop, ki rangtied ka kynhun ki la sdang lehkai bha, bad ka nam ka long ïa ki 56 ron ba la kamai da u Angkit bad ka 38ron na u Manthan Dey. U Pushkar ruh u la lah ban ïarap da 35 ron. Hynrei ka kynhun ka la shah pynma hadien ba shah pynhap wicket u wei hadien u wei da tang 5 ron ïoh kamai, kata la shah pynduna na ka 164/4 sha ka 170/8.
Watla kata ruh, u Avinash (27 not out) ryngkat bad u Charm (6 not out) ki la lah ban kitkhia ban lam lynti ïa ka Meghalaya sha ka namjop khlem shym la hap wicket shuh.
Ka Meghalaya kan hap ban leit sa sha Anand, Gujarat, ha kaba ka kynhun kan aireng sa ïa ka Arunachal Pradesh kaba pynlong ki jingïalehkai ha katei ka jylla. Ka jingïakhun kan sdang naduh 8 tarik Nohprah.
