Khlem jingkieng khlem surok kali shah ieh beiñ ki shnong ba don ha khappud Shella

Dalade sakhi u CM bad DyCM

0

Shillong, K’Lyngkot 05 : Ki nongshong shnong ba sah ha ki shnong ba don ha khappud jong ka Shella Constituency ki la risa lut hadien ba u Symbud Myntri Rangbah ka Jylla, Bah Prestone Tynsong u la pynbna ba katei ka thaiñ kan sa ïoh ïa ka surok ïaid kali bad ruh ïa ka jingkieng kaban weng noh ïa ki jingeh ba bun ba ki mad baroh shi katta.
Ïa kane u Symbud Myntri Rangbah ba dei ruh u National Vice President ka National People’s Party (NPP) u la kren ha ka jingïalang jong ka NPP Shella kaba long ha Umkhabaw ban pan jingkyrshan na bynta ka kyrtong jong ka party, Kong Grace Kharpuri.
Lah ban kdew hangne, ba shwa ban poi sha katei ka jaka ba long jingïalang ki kali ki hap ban ïaid na ka wahbah bad ruh na ka surok khyndew kaba khohrum khohram bha, kaba ju lah ban ïaid lyngba tang ha ka por Tlang.
“Ngam pat ju tip ba ha Shella constituency ki dang don ki jaka bym pat don surok. Kumta, nyngkong shwa ngin sa khot Tender ïa katei ka jingkieng kaban pynïasoh sha kane ka thain ba don sha shilliang wah, bad shisien ba ngi la khot ym slem shuh ban sdang noh ïa ka kam bad hadien pat ngin shna sa ai ka surok,” u la ong.
Ha kajuh ka por u pan ruh ka jingkyrshan na ki paidbah jong katei ka thaiñ ban ai ka jingkyrshan borbah ïa ka Kong Grace khnang ban ïoh noh ïa ka jingkylla ha u 2023.
“Mynta la 35 snem phi la ai synshar tang ha uwei, kumta ha u 2023 pynkylla noh da kaba pynjop noh ïa i Kong Grace kum ka MLA jongphi bad kata kan dei ka jingkylla hadien ka 35 snem,” la ong shuh shuh u Bah Prestone.
Shuh shuh u ong ruh ba lada ka Pynursla constituency kaba don ha syndah ka la kiew kumta ruh ka Shella constituency kadei ban kiew ryngkat ryngkat ha ka roi ka pa.
Ha kajuh ka por, u Bah Prestone u la ong ruh ba ha ka por ba ki hiar da ka helicopter, ki ïohi kyndiang najrong ïa ka jingitynnad jong katei ka thaiñ bad kumta u ong ba hadien ba la pyndep ïa ka jingkieng bad shna ïa ka surok, katei ka jaka kan long kaba itynnad bha bad khring ïa ki nongwan jngohkai pyrthei.
Ha kajuh ka por, u Myntri Rangbah Conrad K Sangma ba dei ruh u National President ka NPP u la ong ba u kubur ba katei ka thaiñ ka la shah iehbeiñ shisha ha ki kam pynroi. “Lada ka jylla baroh kawei ka la kiew balei pat ka jia ïa ka Shella constituency,” u la ong.
Kumta u la ong ba donkam ka jingkylla bad ban pynurlong ïa kane ka jingkylla, donkam ïa ka jingkyrshan bad ka jingtrei borbah jong ki nongthep vote ka constituency ban pynjop donburom ïa ka KongGrace Kharpuri ha kane ka elekshon ban sa long shen.
“To ngin treilang ban ïa kyntiew lang ïa kane ka thaiñ Shella constituency khnang ba kan lah ban kiew ryngkat ryngkat bad ka jylla,” u la ong da kaba bynrap ruh ba u burom ïa u Dr. Donkupar Roy, u MLA barim ka Shella hynrei u ong pat ba katei ka jingwan jong u sha katei ka jingïalang pat ka long ban ïohi bad ïohsngew markhmat na ki paidbah ïa ka jingeh ba ki kynduh.
Hadien katei ka jingïalang u Myntri Rangbah u la pynlut ruh ïa ka por ban ïa kren bad ki nongïalam na katei ka thaiñ ha kaba bun na ki nongshong shnong ki dei na ka Jaidbynriew Garo, Hajong bad kiwei kiwei.

Leave A Reply

Your email address will not be published.