Ka jingïasoh jong nga sha ka NPP kam dei na ka jingshah thied ba 5 klur: Hamlet

Shillong, K,’lyngkot, 05: U Myntri ka sorkar jylla bad u MLA barim ka Mylliem Constituency, u Bah Hamletson Dohling uba la jop na ka tiket jong ka People Democratic Front (PDF) ha ka elekshon MLA ha u 2018 uba la ryngkoh noh sha ka NPP, u la ong ba ka jigjied jong u ïa ka NPP kam dei namar ka jingshh thied ba 5 klur kumba la kam u Bah Banteidor ba ka don ka jingtyrwa lada u pynïasoh sha ka NPP hynrei ka dei beit thik namar ki kam pynroi bad ki mat kiba ka NPP ka kular ban shimkhia hadien ka elekshon.
Haba kren bad ki lad pathai khubor, u Bah Hamlet u la kyntait war ba ka don ka jingtyrwa pisa ïa u ban ïakhun noh na ka NPP ha kane ka elekshon hynrei ka dei beit ki mat kiba u ïeng naduh ki por ba mynshuwa ki ïoh jaka lang ha ka NPP ba un rung.
“Dei u Bah Banteidor uba ong ïa kane un kham tip khma bha hynrei na ka liang jong nga ka jingïasoh kam dei ba shah tyrwa pisa namar kaba kum kata ruh kam don hi hynrei ka dei beit ba ka NPP ka ai jaka ïa ki mat bad ki nongrim kiba nga ïeng naduh mynshuwa bad haduh kine ki sngi,” u la ong
U la ïathuh ba kine ki mat kiba un rah lang sha ka NPP ban pynurlong da ka sorkar thymmai kaba ka NPP kan ïalam biang hadien ka ekekshon ki kynthup ïa ka ILP, ka ktien Khasi ban ïoh jaka noh ha ka khyrnit ba phra, ka jingpynkynriah ïa kiba sah ha Them Iewmawlong, ka kam pynbeit pud.
U la ïathuh ruh ba ka jingshim rai ban ïakhun na ka NPP kam dei ka rai kaba u shim kyrkieh marwei hynrei ka dei kaba la shim lang da ki paidbah ba u dei ban ïakhun beit noh na ka NPP ha ka jingïalang kaba u la lum ha 11 mer.
Ha kane ka sngi kaba u Bah Hamlet u la wan ai ïa ka shithi ban iehnoh na ka jinglong MLA ryngkat u Bah Samlin Malngiang na Sohïong Constituency bad u Bah Jason Sawkmie Mawlong na Umsning Constituency shuwa ba kin pynïasoh ïalade bad ka NPP ha kine ki khyndiat sngi kiban sa wan.
Kine ki lai ngut ki la aiti ïa ka shithi resaiñ ha u Lamphang jong ka Ïingdorbar Thawaiñ ka Jylla u Bah Metbah Lyngdoh ha kane hi ka sngi.
U Bah Hamletson Dohling bad u Bah Jason Sawkmie Mawlong ki dei ki MLA ba la mih noh na ka PDF, katba u Bah Samlin Malngiang u la mih noh na ka HSPDP ban pynïasoh bad ka NPP.
U Bah Samlin u la ong ba ka jinghap shim jong u ïa ka sienjam ban mih na ka HSPDP kaba u la jop elekshon nyngkong eh kam dei ba ka seng kam biang hynrei naamr ka nangtlot nangtlot katba nang mih ki sngi hynrei ka jingdonkam pat ka jylla ka long ba yn ïoh synshar da ka sorkar kaba khlaiñ.
U la ong ba ka la dei ka por ba ki paidbah kin ai lad ïa kawei ka party ban synshar marwei khnang ban ïohi ïa ki kam kiba ka leh namar lada don ka sorkar synrop bunsien ki rai kiba hap shim kim seisoh namar ka jingshah pynthut ha ki para ba don lang ha ka sorkar.
Kum ban shu pynkynmaw, dang shen lai ngut ki MLA ba la shah sospon jong ka seng Congress bakynthup ïa ka Dr. M. Ampareen Lyngdoh, u Bah Mahendro Rapsang bad u Bah Kimfa S. Marbaniang ki la resaiñ na ka jinglong MLA bad pynïasoh ïalade bad ka NPP.
Watla ka NPP ka la ïoh ïa ki hynriew ngut ki MLA ban pynïakhun ha ka elekshon sha ka Ïingdorbar Thawaiñ ka ban sa long shen mynta u snem, hynrei lai ngut ki MLA ki la mih noh na ka NPP ha kaba u Benedic Marak bad ka Ferline CA Sangma ki la resaiñ noh na ka jinglong MLA bad pynïasoh bad ka BJP, katba u SG Esmatur Mominin u la mih noh na ka NPP bad leit pynïasoh bad ka Trinamool Congress mynta ka sngi Palei.
Dang shen u Bah Himalaya Shangpliang uba la bud lang ïa u Dr. Mukul Sangma ban pynïasoh bad ka Trinamool Congress u la risaiñ noh na ka jinglong MLA bad pynïasoh bad ka BJP ryngkat bad Benedic Marak ha New Delhi ha u bnai ba ladep.