237 klur wanrah kam pynroi u MLA, shad kmen u paid Mawthadraishan

Kynshi, K’lyngkot 05: U Bah HB Nongsiej, ha kine san snem ba u long MLA u la lah ban wanrah ïa ki skhimpynroi ha Mawthadraishan Constituency haduh 237 Klur tyngka.
Kane ka long katkum ka report treikam ba la wanrah da u Joint Secretary ka UDP Mawthadraishan, u Bah HK Thabah, ha ka jingïalang paidbah kaba la long ha Kynshi ha kaba da ki hajar ngut ki paidbah nong kyrshan ki la wan sha kane ka jingïalang.
U Bah Thabah, uba la pule ïa kane ka report kaba bniah, u la ong ba kine ki skim pynroi kidei kiba kynthup ïa ka SRWP ne ka MLA Skhim, ki skhim na ka sorkar jylla bad kumjuh ruh ki skhim na ka sorkar pdeng.
Katto katne ki skhim ki kynthup ïa ki skhim na ka Water Resources kiba dei ki skhim ban ai um sha ki jaka rep bad ban pynbha ïa ki jaka rep ne ki Minor Irrigation Project. Baroh ki projek ba la mang bad wanrah ban pyntreikam ka long 46.96 Klur tyngka. Ha kaba ïadei bad ki surok bad ki lynti ki syngkien ki skhim baroh ba la wanrah bad pyntreikam ki long 77.25 Klur tyngka. Nangta ki surok na ka sorkar pdeng ne ka PMGSY ka long 41.01 Klur tyngka. Ha kaba ïadei bad ka jingïarap na ka bynta ka pule puthi, la pynïoh skhim 34.13 Klur tyngka na ka bynta ka jingpynbha bad tei thymmai ïa ki ïing skul ha ki shnong bapher bapher jong ka Constituency. Ha ka liang ka koit ka khiah la pynheh bad pynkha kamra ïa ki 3 tylli ki PHC kiba don ha Mawthadraishan ha ka jinglut kaba 3.21 Klur tyngka. Na ka bynta ban pynroi bad ïarap ïa ki Samla la pynbha ïa ka Madan Phutbol ha Kynshi Pyllun 77 lak, Kynshi Bangla 76 lak, Basketball Court ha skul St. Joseph 13 lak,skul St. Dominic Kynshi 13 lak, Skul Seven Brothers13 lak, Madan Phutbol Umkrem 11 lak, Madan Phutbol Riangmang 5 lak.
U Bah Thabah u la ïathuh shuh shuh ba la ai PA System sha baroh ki Shnong ha Mawthadraishan Constituency bad bun ruh ki Balang. Nangta ki Generator ha baroh ki 11 tylli ki Zone, ki khiew shet na ka bynta ki Seng Longkmie, ki Shuki badTarpolin ha baroh ki Shnong jong ka Constituency. La pynïoh jingïarap ruh 11,500 tylli ki longïing na ka skhim SRWP, 1450 tylli ki longïing na ka Housing. Baroh ki shnong ki la ïoh jingïarap da u khaw ha ka por jong ka COVID 19.
Kum u Myntri ka sorkar u la pynïoh ïa ka skhim na ka sorkar pdeng na ka bynta ka Water Resources ha ka jylla baroh kawei haduh 446 klur tyngka.
Haba kren ha kane ka jingïalang, u Bah Brol, u la ong ba kum u nongmihkhmat u la trei shitom ban wanrah ïa kito ki kam pynroi kiba la wanrah ïa ka report da u Joint Secretary ka Party bad u la kular ruh ba un dang trei shuh shuh lada ki paidbah ki ailad biang ïa u ba un long biang kum u MLA ha ka elekshon MLA mynta ka snem.
U la kular ruh ba lada u jop biang un trei shitom ban wanrah sa ïa ka College ha Mawthadraishan, nangta ka CHC na ka bynta ka jingbit jingbiang ha ka koit ka khiah. Na ka bynta ki samla kiba la nang la stad kiba ym pat ïoh kam, u la kular ban dang bteng ïa ka Coaching Centre kaba u la sdang ha Kynshi ha kine ki snem baladep na ka bynta ban ai jinghikai ïa ki samla kiba wankam wadjam.
U la ong ruh ba kumba u la kular ha ki jingïalang bapher bapher haba u leit sha ki Shnong un ai ki jaiñ ne ki screen bad ki khiew ba buh ja bad jingtah ne ki buffet na ka bynta ki paidbah ba kin pyndonkam ha ki jingkhawai.
Kaba kongsan eh u la ong ba ma u ryngkat bad u Bah Metbah Lyngdoh kum ki nongïalam ba la trei lang bad ki paidbah ban wanrah ïa ka District ha Mairang ba la tip kum ka Eastern West Khasi Hills District ka kam ba danng sah ka long ban wanrah nih ïa ki ophis treikam bapher bapher ki bym pat don ha kane ka District thymmai.
Ha kane ka jingïalang la pdiang burom ruh ïa ki spah ngut ki paidbah nongkyrshan kiba la wan pynïasoh sha ka UDP Mawthadraishan na kiwei kiwei pat ki Party.