Khlad u nongñiah ar shaka bad mynsaw uba shong hadien na ka takhuh kali ha Bamon, Nongnah

Mawkyrwat, Nailar 19: Uwei u samla rangbah uba ha ki karta 35 snem eiei uba nongñiah ïa ar shaka (bike) u la duh ei ïa la ka jong ka jingim hadien ka jingjia takhuh ka ar shaka bad u ñiah kawei ka kali ha kawei na ki jaka ba ki khot Bamon ka lynti ban leit sha Shnong Nongnah, South West Khasi Hills District.
Ha ka tyllong khubor na ki bor pulit la ong ba hadien ba ki la ïoh jingpyntip ha ka 18 tarik u ‘Nailar, 2024 ha ki por kumba 5 baje eiei janmiet ba ka la don ka jingjia ïa takhuh kali ha surok Bamon mar mar ki la leit sha katei ka jaka bad ha ka jingleit tohkit la ïoh jingtip ba kawei ka ar shaka ne bike ba don ïa u No. ML 12 1979 ba la ñiah da u Balsan Arengh, 35 snem na ka shnong Chijong Chiring, South West Khasi Hills District ka la ïa takhuh bad kawei ka kali kaba don ïa u No. AS 03 AA 3177 ba la ñiah da u Motiur Rahman, 34 snem na ka shnong Bagmarachar, PS- Alopatichar Barpeta Assam.
“Katei ka ar shaka ka dang wan lyngba ka surok jong ka shnong Kenïong ba thmu ban hiar sha Ranikor ba la shong ryngkat u Happyrose Thongni, 49 snem na ka shnong Nongnah bad ynda kane ka ar shaka ka la poi ha Bamon kumno re kumno ka la don ka jingïatakhuh noh bad ka kali”, ong ka tyllong khubor. Ym tang kata, ha kata ka kali ruh ki don lang ki 5 ngut ki nongshong ne passenger ha kaba ka jingïatkhuh kiba shong ha ka ar shaka ki la don hapdeng ka jingmynsaw bad la pynkitnoh mar mar shapoh Civil Hospital Mawkyrwat hynrei kaba sngewsih ka long ba tang mar ïa poi ha jaka sumar, u nongñiah ïa ka ar shaka u Balsan Arengh 35 snem, u la khlad noh bad la buh ïa u hapoh ka Morgue Room Civil Hospital Mawkyrwat.
Katba ïa u Happyrose Thongni, 49 snem uba shong hadien jong ka ar shaka, ynda la dep ban sumar la pyllait noh ïa u, katba ïa kita kiba shong ha ka kali pat la phah ban leh ïa ki jingeksamin ha Civil Hospital Mawkyrwat bad ïa ka kali la rah noh sha Mawkyrwat Police Station.
Ka jingtohkit halor kane ka jingjia ka dang ïaid shakhmat.