Shillong, Nailar 25: I Bah Gilfred Sing Giri khun jong I (L)Bressimai Khyriemmujat bad (L)Olim Sing Syiem, Syiem ka Hima Khyrim I la khlad noh ha ka 25/08/2023 ha iingsah jong I ha Nongrimbah Laitumkhrah. Ka jingleit on tep Kan long ha ka 27 Nailar 2023 ha u Lum jingtep ka Balang Presbyterian Laitumkhrah ha Lawjynriew. Ka jinglehniam ha ka sngi tep ha iing Kan long ha ka por 3:00 baje nohphai sngi.
La kha ia I Bah Gilfred Sing Giri ha ka 10 tarik Kyllalyngkot 1933. I la trei kum u nonghikai ha ka Skul miet Mawkhar Christian naduh u snem 1954 haduh 1974 ha ka ba la pynkylla ia ka sha ka skul step. Kum u nongthoh, I la long u Editor jong ka kot khubor Khasi “Ka Lympung Ri Lum” ka ba la pynmih man ka sngi saitjaiñ ha u snem 1956 – 1957.
Ha ka saiñ pyrthei, I la long u nongkyrshan ba radbah ia ka jingïaleh Hill State kane ka jylla jongngi. I la long ruh u dkhot jong ka India Tribal Union bad trei ryngkat bad kiwei ki riew saiñ pyrthei kane ka thaiñ.
I la long u dkhot jong ka United Khasi and Jaiñtia Autonomous District Council bad hadien ka Khasi Hills
Autonomous District Council naduh ka snem 1958 haduh 1967. Ka Dorbar jong ka Council ha u bnai Rymphang – Lber 1966, ka la jied ia I kum u Chairman jong ka Khasi Hills Autonomous District Council bad I la bat ia kane ka kyrdan haduh u snem 1967
I la long ruh u Member jong ka Legislative Assembly jong ka Provisional Government jong ka Autonomous State of Meghalaya ha u snem 1970.
