Nongstoiñ, Lber 26: Ka West Khasi Hills District Boxing Association ka phah ïa u kyrwoh sngew lem sha ki ba haïing hasem jong u samla (L) Dajiedlang Mawsor, u ba dei u khlur ïa kura ba paw jong ka thaiñ West Khasi Hills bad jong ka jylla hi baroh kawei.
Ka WKHBA ka dap da ka jingsngewsih kthang ïa ka jingduh noh ïa u khlur ïa kura jong ka thaiñ, u ba la wanrah ïa ka nam ka burom ïa ka thaiñ West Khasi Hills District lyngba ki lympung jingïakop ïa kura ha ka jylla kum ha ka 3rd Meghalaya game 2019-2020 kaba la dep pynlong ha Shillong.
Kumban pynkynmaw ba ha katei ka jingïakop u (L) Dajiedlang Mawsor, u la khur ha ka kyrdan kaba lai (bronze medal) bad kane kadei ka jingsah jingkynmaw ha ki jingïathuh khana bad ha ka pateng ka ban wan jong ka kynhun, ha kaba utei u samla u la wanrah nam wanrah burom.
Ka WKHBA ka phah ka khubor sngew lem sha kiba haïing hasem u (L) Dajiedlang Mawsor ha ka jingkhlad ba kyndit jong utei u khun dap shynrang. Ai ba ka mynsiem ba kordor jong kan shong jahthait ha ka jingsuk. To ai u Blei nongbuh nongthaw un pyntngen ïa ka ïing ka sem baroh kawei, pynkut ka kyrwoh sngewlem na u samla D.Sun President WKHBA.
