Shillong, Lber, 26: U Kyrtong ka Voice of the People Party (VPP) Dr Ricky AJ Syngkon ha ka sngi Baar u la kyntait war ba ka party ka dei kaba pyrshah ïa ka ktien Hindi.
“Ngim pat ju pyrshah ïa ka jingkren Hindi. Kane ka jingkynnoh ka dei tang ka buit saiñpyrthei da kiwei pat ki seng saiñpyrthei bad ngi pynrem jur kum ïa kine ki jingkynnoh,” ong u Dr. Syngkon haba kren sha ki lad pathai khubor hadien baladep thep kyrteng na Shillong Parliamentary Seat.
Da kaba pynpaw ba ka VPP ka ieng ruh na ka bynta ki nongshong shnong bym dei riewlum kiba dei ki nongshong shnong bapura ka Meghalaya, u Dr. Syngkon u la ong, ba u don ka jingsngew skhem ba kine ki nongshong shnong ka jylla kin kyrshan ïa ka party ha ka elekshon Lok Sabha.
“Ngi burom ïa ka jingnoh synniang jong kiwei pat ki jaidbynriew ki bym dei ki Khsi kiba la noh synniang shikatdei eh sha ka Jylla bad ki donkam ruh ka jingïada bad ka party kan pynthikna ruh ba yn ïada ïa ka bha ka miat jong ki bad ha kajuh ka por ngi hap ban ïada ïa ka Jylla na ki briew kiba leh beaiñ, na ki briew kiba wan rung beaiñ. Kum ka party ngi sngewkhia wat halor ki hok jong ki briew ki bym dei ki Khasi,” u la ong.
Haba pynpaw ba u don ka thong ban jop ha ka elekshon, u Dr. Syngkon u la ong ba ka party ka la pynkhreh bha ban ïakhun ha ka elekshon. Katkum ka jingong jong u, ka party ka la leit sha baroh ki 36 tylli ki constituency ha rilum Khasi bad Jaiñtia.
“Ma nga bad ka party ngin don ka jingkyrmen ban jop ïa ka elekshon namarba kat shaba ngi leit ngi ïoh ïa ka jingkyrshan kaba khlaiñ na ki paidbah bad ngi don ruh ka jingshaniah ha ki paidbah jong ki 36 tylli ki Constituency,” u la ong.
U la kyntiat ruh ba ka party ka shim kabu ïa ka jaidbynriew. “Ngim pat ju ong ïa kata, hynrei haba ngi leit sha u paidbah ngi kren kumno ban wanrah ïa ka synshar ka khadar kaba khuid ha ka jylla bad ban pynthikna ba ka hok kan ieng rasong, ban weng ïa ka jingduk jingkyrduh bad ki ishu kiba ngi ju ïakren nalor kaba ïada ïa ka hok jong ki paidbah nongshong shnong ka jylla,” u la ong shuh shuh.
U Dr. Syngkon u la ong ba ka rai jong ka BJP ban kyrshan ïa ka NPP ka la pynpaw ïa ka dur ba shisha jong ki ar tylli ki party hynrei ki ieh pat ha ka jingstad jong ki paidbah ban shim ïa ka rai halor kane.
