Khliehriat, Risaw, 18: Ka jingpynsngew paidbah ba la pynlong ha ka sngi Thohdieng ha ka shnong Wahïajer, East Jaiñtia Hills District halor ka jingthmu ban shna ïa ka karkhana dewbilat Meghatop Cement Private Ltd ka la ïaid beit haduh kaba kut namarba ki Volunteer kim shym la ailad satia ïa kiba pyrshah ban rung shapoh ka jaka ba la pynlong ïa ka public hearing bad la khang lynti noh ïa kiba pyrshah.
Ki nongïalam bad ki dkhot jong ki sengbhalang bapher bapher ba kynthup ïa ka Hynñiewtrep Integrated Teritorial Organisation (HITO) ba la lam khmat da u President u Bah Donbok Dkhar, ka Federation of Khasi Jaiñtia and Garo People (FKJGP ba la lam khmat da u President u Bah D.Sumer, ka Hynñiewtrep Achik National Movement (HANM), ka Jaiñtia Women Council (JWC) ba la lam khmat da ka President ka kong Bansara Lamare bad ka Secretary ka kong Nica L. Lapasam bad kiwei kiwei kiba pyrshah ïa ka public hearing jong ka Meghatop Cement Ltd ki khlem ïohlad satia ban rung sha ka jaka ba long jingïalang namar ka jingshah khanglad ha ki Volunteer jong ka Meggatop bad ki bor Pulit
Ha ki kynta ba la shah khanglad ka la mih ka thma ktien bad ka jingïakyntur hapdeng ki dkhot sengbhalang bad ki Volunteer.
Ka President jong ka Jaiñtia Women Council (JWC) ka kong Evansara Lamare ka la pynrem jur ïa kane ka jingshah khang lynti da kaba ong, kan myntoi aiu ban khot pynlong ïa ka jingpynsngew paidbah khlem da ïoh lad ban pynsngew ïa la ka jong ka nongrim ha rynsan ban pyrshah ïa ka jingthmu.
Kum ka seng hashwa ban leit sha ka jingïalang Public Hearing ka ladep ban pan jingbit shwa na u Deputy Commissioner ka East Jaiñtia Hills ban ïashim bynta khlem da wanrah kino kino ki jingpynklumar da kaba ïaid ha ka lynti kaba jaijai. Ka la ong kane ka jingleh jong ki nongshong shnong bad ki bor Sorkar ka la long kumba ki la dep “shah thied ha ka Company kaba thmu ban seng kharkhana.”
Ka la kynthoh ïa kane ka jingpynlong ‘Public Hearing’ kaba la shah tang ïa kiba kyrshan, katba ïa kiba pynshah ki khang lad ban leit ïashim bynta bad kane ka la long kum ba pynkheiñ ïa ka hok ban ïoh kren. Ka la kynthoh jur ïa ki Pulit kiba la pynsahkut khnang ïa ki kali ha shi lynter ka surokbah NH-6 naduh ka por mynstep tad haduh ban da kut ka Public Hearing.
Ka la kren shai ba kum ka seng ki longkmie wat lada kim ïoh lad ban leit ïashim bynta ha ka Public Hearing, hynrei kin ïeng beit ha ka nongrim khlem kynran dien ban pyrshah ïa kane ka jingthmu seng Karkhana ha kine ki sngi ban wan.
Haba phai pat sha ka jingïalang public hearing, baroh kiba la ai jingkren halor rynsan ki la ai ka jingkyrshan ba pura ïa ka jingthmu ka Meghatop ban tei ïa ka karkhana dewbilat ha ka shnong Wahïajer.
U Doloi jong ka Elaka Narpuh u Bah Manbha Kyndoh, u la ong ba ka jingwan ka kompeni ka wanrah jingmyntoi ïa ka shong ka thaw bad ïa ka thaiñ hi baroh kawei, kumjuh ruh u MDC barim jong ka Narpuh u Bah D.Pohshna, u Bah Daïapherbha Lamare, u Waheh Shnong ka Tongseng u Bah Vilin Suchiang, u Waheh Shnong ka Wahïajer u Bah Banjop Suting, u Waheh Shnong ka Kuliang u Bah Min Lamare, u Waheh Shnong jong ka Pyrtakuna u Bah Loveyou Bareh bad kiwei kiwei kiba la ai jingkren ki la ai ka jingkyrshan ïa ka Meggatop bad ki la kyntu ïa ki bor bahalor ba kin ai noh ïa ka Clearence ban shna ïa ka karkhana dewbilat jong ka Meghatop ha ka shnong Wahïajer.
Ïa ka jingïalang la pynïaid da u Environmental Engineer jong ka tnat Meghalaya Pollution Control Board, u Bah Y.F.Laloo, ryngkat ka jingdonlang jong u ADC ka East Jaiñtia Hills District u Bah G.Warjri bad kiwei kiwei ki heh sorkar.
