Khliehriat, Risaw, 18: Ka la mih ka thma ktien kaba jur hapdeng ki Volunteer kiba la ieng ap pahara kiba kyrshan ïa ka public hearing jong ka Meghatop Cements Private Limited (MCPL) bad ki nongïalam jong ki sengbhalang kiba ieng pyrshah ïa ka public hearing.
U President jong ka Hynñiewtrep Integrated Teritorial Organisation (HITO) Bah Donbok Dkhar ha ka jingïakren bad ki lad pathai khubor u la ong, “ngi la wan khnang ban ïoh pynsngew ïa ka jingpyrshah ïa ka public hearing jong ka Meghatop Cement Private Ltd. Haba kren ïa ka jingshisha, haduh katno ka jingjakhlia kaba mih na ki karkhana, haduh katno persen ka jingkiew ha ka ïohkam ïoh jam ki samla ka thaiñ. Ngim shym la wan ha kane ka jaka ban ïapyni bor hyn rei ban ïohkren halor rynsan halor ki jingshisha ba ka seng ka pyrshah.”
U President jong ka Khasi Students (KSU) Union Narpuh Circle, u Bah K.S.Suchiang uba la ieng ruh na ka bynta ka FKJGP u la pynshai halor ka jingpyrshah jong ka seng ïa ka public hearing da kaba ong, “ym lah shuh ban tip kaei ka ban jia hadien habud lada kine ki karkhana dewbilat kin dang bteng ban wan sha ka thaiñ Narpuh. Ka KSU bad ka FKJGP naduh ba nyngkong ngi la pynpaw ba ngi pyrshah namarba ngi sngewthuh ïa ka lawei jong ka jaitbynriew, khamtam eh ka ktah ïa ka mariang. Kane ka jingthmu ban pynlong ïa ka public hearing ka dei ka bym khuid bad nga tharai ki paidbah ki ïohi bad ki sakhi ïa kaei kaba la jia hangne. Kine kiba ieng hangne lada ngi tur bad leh da ka bor ngi lah da kaba suk hynrei ngim kwah ban leh ïa kata namar lada ngi tur ngin ïa ïap para ma ngi kiba dei para doh para snam.”
“Kiba khanglad ban pahara ki dei ki paradoh parasnam jong ngi bad ngim tip mano ba phah ïa ki. Tangba ngi sngewthuh ba ka dei ka buit sianti jong ki khar poiei, namar ki peit na kyndong bad ki rkhie ïa kane ka jingïaleh para ma ngi. Ha ka jingshisha, ki dei ban sngewthuh bad ban ailad ïa ngi ban rung sha ka jaka ba la pynlong ïa ka public hearing. Ka Meghalaya Pollution Control Board (MSPB) ka ladep pynbna ba ka khot ïa kane ka jingpynsngew paidbah ïa baroh ban pynpaw ïa ka jingpynsngew ha kane ka public hearing bad ngi don ka hok ban pynsngew,” la ong u Bah Suchiang.
“Hynrei mynta ka long kaei kaei kaba ngim lah ban pdiang kumta ngi kum ka seng ngin ïaid shakhmat da kaba ngin hap ban ujor sha ka Iingbishar Meghalaya High Court namarba kane hi kam dei shuh kaei kaei kaba ïaid katkum ka aiñ. Kine ki briew kim sngewthuh satia. Ngi wan hangne ym ban ïaleh bad ki paradoh parasnam, ym ban ïaleh bad ki nongshong shnong ka Wahïajer hynrei ki dei ban sngewthuh ba kane ka public hearing kam dei ka jong ki nong Wahïajer hynrei ka dei jong ka Meghatop Cement Private Limited ba la pynïaid da ka MSPCB ryngkat bad ka bor synshar district. Kiba kah lynti ngam tip shuh, kaei ka jingmut jong ki? Tang kawei, ka KSU kan hap ban ujor namarba kane ka jingleh ka dei imat kaba don eiei sha lyndet,” u la bynrap.
U la pynpaw ruh ka jingsngewkhia ban ïohi ba ki don kiwei pat ki bar jylla kiba ïoh rung da kaba suk sha ka jaka ba la pynlong ïa ka public hearing katba ïa kiba pyrshah la khang ban rung sha ka jaka ba la pynlong public hearing.
“Mynta ngi sakhi ba ki don ki bar jylla kiba ïoh rung da kaba suk, hynrei ïa ngi pat balei kim shah ban rung, hangne kein ka jingarsap, ka jingbym khuid shuh kata ka public hearing, ka mut aiu kane,” la kynthoh u Bah Suchiang bad bynrap ruh da kaba ong, “kane ka public hearing ka dei kaba la shu leh tang ban dep rukom namarba ngi sngewthuh ba ka Sorkar ne ka State Environment Impact Assesment kam lah ban ai Clearance lada khlem kano kano ka public hearing. Dei na kata ka daw ki hap ban pynlong ïa ka public hearing tang ban pyndep rukom.”
U la ong ruh ba ki kynhun sengbhalang lem bad ki paidbah ki don ka jingthmu ban leit sha ka jaka pynlong public hearing ban kren bad ban ai ka jingpynshai namarba ngi sngewthuh ba ka lawei sha kane ka thaiñ kan long kaba dum bad kaei ka ban jia ngim tip shuh. Shisien ka sngi, kine ki paidbah kiba kyrshan kin sa kynmaw ba ki sengbhalang ki ladep ieng pyrshah bad tip hadien katno snem ngi tip tang kawei kine kiba kyrshan kin sa sngewthuh.
