Hiar thma ki hati ïa ka ïing bad pynjot ïa ki mar rep ha ka shnong Panchiring

Mawkyrwat, Risaw, 18: Ka kynhun ki hati khlaw ha ka miet sngi Palei ki la hiar thma bad pynjot ïa kawei ka ïing bad kumjuh ïa ki jingthung jingtep ha ka shnong Panchiring, South West Khasi Hills District.
Ka khubor ba la phah da u Myntri Shnong jong ka Panchiring u Bah M. Kharbani, u la ïathuh ba ka kynhun ki hati khlaw ki la wan hiar thma ha ka por kumba 10:30 baje ei ei mynmiet bad ha kane ka jingjia kawei ka ïing jong u Bah Jestar Syiemlieh ka la shah ktah bad kumjuh ruh ki jingthung kum u kwai bad kiwei kiwei.
La ïathuh ruh ba ka Dorbar Shnong Panchiring ka dap da ka jingsngewkhia halor ka jingwan poi shi kynhun ki hati khlaw kiba la pynjot pynpra ïa ki ïing ki sem bad ïa ki jingthung jingtep.
Ha ka sngi Thohdieng, ka Dorbar Shnong ryngkat ki paidbah ki la ïa mih ban leit beh ïa ka kynhun ki hati hynrei ha ka jingpyrshang kim shym la lah ban leh ei eiei.
Kumta, ka Dorbar Shnong ha kane ka kynti ka la kyrpad ïa ka sorkar ba ka dei ban leh eiei noh ïa ki hati khlaw kiba don ha ka ki thaiñ lym kumta ka Dorbar Shnong kan hap ban shim da kiwei pat ki rai.