Kham khia ka ram bad ka burom ka jaitbynriew ban ïa ka jingshah rem 110 vote: K.P.Pangñiang

Nongstoiñ, Lber, 8: “Ka jingshah rem tang da ki shispah shiphew vote ha kane ka MLA election ba dang shu dep, kam shym la pynsgewsih ne pynsah ram ïa nga”, ong u bah K.P.Pangñiang president rangbah ka HSPDP haba ïakren bad u nongthoh khubor mynta ka sngi.
U bah Pangñiang u la ong ba wat la u shah rem ruh u hun beit, namar ka dei ka mon u paitbah hynrei kum u nongïalam ba hakhlieh duh jong ka HSPDP, un ym iehnoh ban shakri ïa ka jaitbynriew Khasi Pnar, wat hapdeng ki jingkhih phaloh jong ka saiñ pyrthei ka bym I don jingkyrmen shuh ba yn dang lah ban khyllie pat sa shisien, lane ban pynwandur ïa ka jingjot jingpra ha baroh ki liang.
U la ong ruh, “Ka jingshah kynnoh bad ka jingshah bynthiew ha ki paitbah ka jylla ha kine ki sngi, kam dei ïa kiwei pat ki seng saiñ pyrthei kiba la leit ban kyrshan lang ïa ka NPP ban thaw ïa ka sorkar thymmai. Hynrei ka jingkynnoh bad bynthiew ka dei tang ïa ka HSPDP marwei, namar ki ar ngut ki MLA jong ka party ki dei kiba nyngkong eh ban leit ai jingkyrshan ïa ka NPP ba kan thaw sorkar”.
“Nga la khot ïa ki ar ngut ki MLA ba kin wan phai biang, hynrei haba la ñiew ïa ka jingdon jong ki MLA bad wat lada kitei ki ar ngut ki MLA ka HSPDP kin wanphai biang ruh, ka jingdon jong ki MLA ki long tang 28 ngut kata 11 na ka UDP, 4 na ka VPP, na ka Congress 3, na ka AITC 4, na ka PDF 2 na ka HSPDP 2=28. Hynrei ban ïoh thaw ïa ka sorkar ka donkam 31 ngut ki MLA”.
Nalor kata u la ong ruh, “Wat lada uwei u kyrtong shimet jong ka Rambrai Jyrngam un wan ban kyrshan lang ruh, dang don tang arphew khyndai ngut. Hynrei ban khmih lynti ba u kyrtong shimet na Rambrai Jyrngam bad u kyrtong shimet na Baghmara, ba kin wan kyrshan ïa ki party riewlum,te ka long tang ka jingphohsniew rngai. Kumba ka UDP ka phohsniew ban pynïeng saw ngut ki kyrtong na Garo Hills, hynrei ym don wat uwei ruh u ba poi sha ka thong. Kitei ki saw ngut ki kyrtong ba ka UDP ka pynïaleh na Garo Hills ym don wat tang uwei u kyrtong u ba lait ïa ka security”.
Haba kylli pat la un iehnoh noh ne un dang ïai bat ïa ka kam kum u president rangbah jong ka party, u bah Pangñiang u la ong ba ïa ka jingiehnoh jyndat jong u bah Ardent Basaïawmoit ha u 2018 ka dei ka mon jong u shimet, namar lehse um sngew ïahap ban shu don sah bad ka HSPDP ruh um lah ban tip.
Hynrei, kum u nongïalam jong ka party u don ka jingsngewkhia bad ka jingsngew kit ram kaba khraw na ka bynta ka jaitbynriew Khasi pnar, namar ki jingangnud kiba la pruid dak da u (L) bah Hopingstone Lyngdoh u nongseng jong ka party, haduh mynta kim pat urlong kum kaba pynrung ïa ka ktien Khasi ha ka Khyrnit kaba phra jong ka Riti synshar ka ri, ka Khasi Jaiñtia State bad kiwei kiwei. Dei halor katei ka nongrim ba kum u nongïalam jong ka party u dang kwah ban bat ïa kam katba u dang lah.
U bah Pangñiang u la ong ruh, “La bun sien bun wat kiwei pat ki seng saiñ pyrthei ki la wan khot ïa nga ha kaba ki la tyrwa ruh ba kin ai da ki klur tyngka na ka bynta ba ngan ïaleh election. Hynrei haduh mynta ka klur tyngka jong kiwei pat ki party kam pat lah ban pynbiej ïa nga bad nga dang ïeng skhem triang ha ki nongrim jong ka HSPDP. Lano lano ruh ngan ym kynriah na ka party namar nga sngewthuh shai ba ha kawei ka sngi ka jaitbynriew Khasi Pnar kan sa sngewthuh ba dei tang ka HSPDP kaba don ïa ki nongrim kiba skhem ban ïada ïa ka jaitbynriew”.