Shah ktah ki paidbah ba hap trei ar District ki Ophisar sorkar

0

Nongstoiñ, Lber, 8: Ka jingpep trei khah khah ki ophisar ha ki tnad ophis sorkar bapher bapher, ka la ktah shibun ïa ki paidbah u ba leit donkam ha ki ophis. Ym tang katta hynrei ka jingpep trei jong ki, ka wanrah ruh ïa ka jingpynduhnong bad ka pyndkoh ha ka rukom treikam, la ka long ïa u paidbah ne ïa ki ophisar, namar kim lah shuh ban pyndep ïa la ka thong kaba la bthah da ki bor kiba halor.
Haba ïadei bad katei phang haba u nongthoh khubor u la pyrshang ban wad jingtip kaba kham bniah, kaei ka daw jong ka jingpep trei, ha kaba la lap pynban ba ka jingshisha ka long namar ba u juh u ophisar u hap ban khmih ne peit haduh ar jaka ki ophis. Kane ka pynlong ba lada u don ha kawei station u hap ban pep noh shawei bad ki paidbah kim ïoh ban ïakynduh ha ka por kaba ki donkam. Kane ka ktah eh khamtam ïa kiba wan na ki shnong nongkyndong.
Kum ban shu pyntip bad ban pynshisha ki katto katne ngut ki ophisar kiba hap ban khmih haduh ar jaka, ha kaba ki ophisar kiba dei jong ka West Khasi Hills District, hap ban khmih lang ruh ïa ka Mairang, Eastern West Khasi Hills. Ym tang katta hynrei dang don shibun kiwei pat ki ophisar kiba hap ban khmih lang ruh wat shaduh Mawkyrwat ne Southwest Khasi Hills District, kum na PHE bad kiwei kiwei.
Ka jingkylli ka long hato kitei ki ophisar kin ïoh tang kawei ka tulop ne na baroh ar ï. Lada ka long na baroh ar, balei pat kam thung da uwei u briew, haba katne ki samla wad kam wad jam ki nang hiran. Lane hato ka dei namar ba ka sorkar kam don pisa bad lada kam don pisa balei pat la shu ai District thymmai, ai Civil sub division, ai Block. Hato kam long ka jingduhnong kaba khraw lada don tang ka ïing thymmai pynban kaba khongreng khlem ki jingdonkam.

Leave A Reply

Your email address will not be published.