Mawkyrwat, Lber, 08: Kum shibynta ban ïasnohkti lang ha ka jingrakhe ïa ka sngi ba kyrpang ki longkmie ne ka International Women’s Day 2023 kaba dei halor ka phang, “Ka juk jingstad teknoloji ha ka jingïaryngkat lang hapdeng ki kynthei bad shynrang” (DigitALL: Innovation and technology for gender equality), ki shnong kiba hapoh ka South West Khasi Hills District ha ryngkat ka jingiphuh i-phieng ki la ïoh ban rakhe ïa kane ka sngi ba kyrpang.
Ha kane ka jingrakhe la ïoh ban ïashimbynta shitrhem da ki longkmie, ki samla kynthei hapoh ki shnong ki thaw ryngkat ka jingïadonlang bad ki rangbah jong ki shnong, bad kiwei de kiba la ïadonbynta ha kaba ai ïa ki jingkren bad jingpynshai halor ka jingthmu bad jingrakhe ïa kane ka sngi ba kyrpang.
Ha kaba ïadei bad ka jingrakhe ïa kane ka sngi, ki longkmie jong ka thaiñ Mawsaw lyngba ka Persyntiew Village Organisation ha ryngkat ka jingïasnohktilang jong ki Self Help Groups (SHGs) ki la ïoh ban rakhe da kaba ki la sdang nyngkong da ka jingïaid paidbah ne rally bad hadien kata bud da ka jingïalang ba lyngkot ha kaba ka kong I. Paliar, President jong ka Persyntiew Village Organisation ka la ai ki kyntien pdiang sngewbha bud sa ka jingrwai pdiang na ka kynhun jong ka Ïaipyrshang SHGs.
Ki nongkren ha kane ka sngi ki long u bah A. Sohshang, Rangbah Shnong, ka kong Ribanisha Thongni na ka Kur, ka jingkren na u bah R. Ramsiej, Secretary VEC bad ka jingkren na u bah Humbleland Hujoon.
La pynshit pynshngaiñ ïa kane ka sngi ba kyrpang ki longkmie da ka skit na ka kynhun Haide bad Ïasnohktilang, ka jingshad na ka Monsngewbha bad kiwei de ki prokram kyrpang.
