Nongstoiñ, Lber, 8: Ka jingbym lah jong ka sorkar ban pynbiang ïa ka rukom treikam ha Parïong Primary Health Centre, ka la pynlong ïa ki paitbah ba kin ïakynduh jingeh ha ka por ba ki leit phah sumar haba ki pang ki shitom.
Halor kane ki nongïalam ka Hynñiewtrep Youth Council Mawthadraishan circle, hadien ba ki la ïoh jingtip halor ka jingbym biang jong katei ka jaka sumar, ki la hiar ban jurip bad ki la lap ba katei ka jaka sumar ka dang donkam bun bha ki bynta ban pynbiang ha kaba ïadei bad ka jingsumar ïa kiba pang ba shitom.
U bah Shembor Langrin President ka seng haba pyntip ha u nongthoh khubor, u la ong ba ha katei ka jingleit jurip ki la lap ba ki jingduna ki long naduh ka jingdon jong ki nongtrei, ka jingbym shimkhia jong ki nongtrei kiba lah dep don lypa.
U la ong ruh ba kaba sngewsih ka long ba katkum ka jingïathuh jong ki nongpang kiba leit phah sumar ha katei ka jaka ,ki la ong ba ki don ki por ba ynda la poi ka sngi thohdieng ïa ki nongpang kiba wan phah sumar ha katei ka jaka ,ki hap ban pynkynriah sha kiwei pat ki jaka sumar bad katei ka jingleh ka pynjynjar haduh katta katta ïa ki nongpang.
Utei u nongïalam ka seng u la ong ruh ba ki la ïoh ban ïakren ruh bad u Doktor u ba peit ïa katei ka jaka sumar bad haba ki la kylli ba ka don ne em ka jingpynkynriah ïa ki nongpang na katei ka jaka sumar kumba la kynnoh da ki nongshong shnong, u Doktor u la pynshai ba kam shym la don kaba kum kata.
Hynrei, ka jingpyn-kynriah ïa ki nongpang sha kiwei pat ki jaka, ka dei tang ha ki por ba la bun palat ki nongpang bad ym don jaka shuh ban thiah, namar ki jingthiah ki don tang khyndiat tylli. Kumta kim banse ban phah sha kiwei pat ki jaka sumar kiba kylluid bad kiba kham don bun ki jaka thiah, namar ban shu pynthiah ha baranda ïa ki nongpang, ka long kaei kaei ka bym lah ban long namar ki donkam ïa ki jingthiah kiba biang.
Na ka liang ka seng ka dawa na ka sorkar ba kan pynbiang noh ïa katei ka jaka sumar, kata ba kan thung noh ïa baroh ki nongtrei kiba dei ban trei ha katei ka jaka sumar naduh ki Grade IV, Ward attendance ki jaka sah jong ki staff Nurses, paiñkhana paitbah ban pynheh shuh shuh ïa ka building bad ban pynbiang ïa ki kamra, naduh ka kamra ba u Doktor u dei ban shong bad examin ïa ki nongpang bad kiwei kiwei.
