K a jingdawa ban pyntreikam ïa ka Inner Line Permit ha kane ka jylla Meghalaya ka la ïaid mynta la 3 snem tam hynrei kane ka jingdawa ka dang sahkut hapoh ka Almari jong ka Ministry of Home Affairs jong ka Sorkar India kaba dang bishar ïa kane ka jingdawa.
Ka Ingdorbar Thawaiñ jong ka Jylla ha ka 19 tarik, Nohprah, 2019 ka la mynjur ïa ka Resolution ban pyntreikam ïa ka ILP ha kane ka jylla Meghalaya bad kane ka Resolution lehse kaba tang ar sla haduh mynta ka Sorkar India ka dang eksamin khlem pat ai resol satia watla ki lai snem kynthih ki la tyllun.
Ka Sorkar kaba rim hapoh ka jingïalam jong u Conrad Kongkal Sangma ka la pyndep ïa la ka jong ka kamram bad ki 60 ngut ki MLA ki la mynjur da kawei ka sur ban pyntreikam ïa ka Inner Line Permit ka aiñ ka ban khanglad ïa ka jingwan rung kyrthep jong ki mynder ha kane ka jylla. Hynrei ka Sorkar Meghalaya Democratic Alliance-II kaba dang ïalam hi da u Conrad Sangma kan dang hap ban buddien ïa kane ka jingdawa kaba u paidbah u la angnud bad u la khmihlynti la slem bha namarba ka Meghalaya ka dei ka jylla kaba don markhap bad ka ri Bangladesh.
Dang ha ka sngi kaba u Conrad Sangma u la bam smai kum u Myntri Rangbah jong ka Jylla ha ka sien kaba ar, ula kren sha ki lad pathai khubor ba ka Sorkar jong u kan dang ïaid buddien ban pyntreikam ïa ka Inner Line permit (ILP) hapoh Meghalaya bad ïa ka kam ban pynbeit noh ïa ka jingïakajia pud bad ka Jylla Assam ha kane ka samoi san snem. Sa kawei pat ka jingangnud jong u paidbah ka dei ka jingdawa ban pynrung noh ïa ka ktien Khasi bad Garo hapoh ka Khyrnit Baphra jong ka Riti Synshar ka ri India
Kine ki dei ki mat kiba u paidbah hi haduh mynta u dang angnud ban ïohi ba ka Sorkar kaba thymmai ha kane ka kynti ka dei ban shimkhia bha nalor ba ki dei ruh ki mat kiba la sahteng mynta la slem bha.
Lada kane ka Sorkar kaba mynta kam lah satia ban pynurlong ïa kine ki jingdawa, u paidbah un sa tip shai ba ka BJP ka shu pyndonkam ïa ka NPP tang ban ïoh jingmyntoi ha ka saiñpyrthei. Ha ka elekshon ba ladep ka BJP kam shym la pynrung satia ïa ka mat ILP hapoh ka Manifesto hynrei u General Secretary ka BJP u Rituraj Sinha u la ong ba ka dei ka mat kaba da hap ban ïasyllok bha bad ki kynhun bapher bapher.
Kane ka jingkren jong une u nongïalam ka BJP ka pynpaw lehse um pat tip eiei hi ruh ba ka Ingdorbar Thawaiñ jong ka Jylla Meghalaya ka ladep mynjur ïa ka Resolution bad mynta kane ka jingdawa ka dang sahkut hapoh ka Almari jong ka Ministry of Home Affair. Ha kawei pat ka liang, ka jingkren jong une u Sinha ka pynpaw ïa ka jinglong kaba ar sap jong ka BJP kaba ap kmang ban ïoh shim kabu ha ka elekshon kaba dang shu dep shen kumba ka la khmihlynti ha Manipur ha ki snem baladep hynrei phewse kane ka jingkhmihlynti ki la shu pulom khlem da lah ban thaw pyrthei shano shano ruh.
Ki jingdawa kin shu sahkut hapoh ki Almari jong ka Sorkar India lada ki nongïalam jong kane ka Jylla Meghalaya kim buddien kumba ki leit buddien ïa ki song pynroi ban dawa ïa ka bhah kaba ka Sorkar Jylla ka dei ban ïoh na ka Sorkar Pdeng. Ki jingdawa kin sa shu kut tang ha ki jingïakren bad kan ym don satia kano kano ka jingseisoh lada kam don ka jingbuddien bad ka jingshim na ki nongïalam jong ka jylla khamtam eh na ka Sorkar Jylla.
