Mumbai, Lber 08 : Ka shi kol ba la thep da u Sunil Chhetri ka la pynlong ïa ka Bengaluru FC ban pynliem da 1-0 kol pyrshah ïa ka Mumbai City FC ha ka jingïalehkai semifinal jong ka leg 1 ha ka Indian Super League (ISL) 2022-23 ha ka miet sngi ba ar ha Mumbai Football Arena.
U Chhetri u la mih madan kum u rangïalehkai shongben ha Mumbai Football Arena bad thep ïa katei ka shi kol ha ka minit ïalehkai ba 78 ha kaba ka Blues (Bengaluru FC) ka don jingkyrmen ha ka jingïalehkai semifinal kaba ar ha Bengaluru ha ka sngi U Blei mynta ka taïew.
Ka Mumbai City kaba la lah ban ïalehkai bha ha baroh ka samoi, sa shisien ka la wanphai biang da kaba pynpra ïa ki bynta ïalehkai jong ka kynhun pyrshah bad ka ïoh kham bun ki kabu ban thep kol ban ïa ka Bengaluru FC.
Ha ka minit ïalehkai kaba dang ïaid ar minit, u Greg Stewart u la buh bol bha hapoh box na ka bynta u Bipin Singh, hynrei ka bol ba la khyrwit da u Bipin la ïoh ban kyrda noh da u Prabir Das. Utei u rangïalehkai dien (defender) u la ïoh biang ban mih madan tang hadien shiphew minit u la lah ban kyrda ïa ki bol ba la shut da u Lalengmawia Ralte bad Jorge Diaz.
Hadein ba ka bol ka la lait noh sharud, u Roshan Naorem u la pashat beit sha u Mourtada Fall, hynrei u Phurba Lachenpa u la ur noh ha madan shuwa ba u Roy Krishna un khyrwit ïa ka bol kaba la tam noh ïa u dieng kol.
Tang hadien ki san minit shuwa ban kut ka kylla step, u Stewart u la pashat sha u Diaz hapoh box ha kaba utei u rangïalehkai u la ïoh ban bat ïa ka bol. Hynrei u Gurpreet Singh Sandhu u la ïoh ban kem noh ïa ka bol shuwa ba utei u rangïalehkai ka Argentina un ïoh ban shut ïa ka bol, kumta haduh kaba kut jong ka kylla step baroh ar ki kynhun ki la leit phai sha la ki kamra khreh khlem da lah ban thep kol.
Ha ka kylla miet, ka Bengaluru FC ka la pynmih madan ïa u Sunil Chhetri ha ka jaka u Sivasakthi Narayanan,bad utei u rangïalehkai ba la ïaw jong ka ri India u la lah ban pynkylla ïa ka rukom ïalehkai jong ka kynhun.
Ha ka jingïalehkai kaba la poi mar shiteng jong ka kylla miet, u Das u la ïoh ban khyrwit ban thep kol na shajngai hynrei ka bol ka la tam noh ïa u dieng kol, katba ïa ka jingïalehkai la sdang ban thep kol nyngkong da ka Bengaluru FC. U Chhetri u la ïoh ban thep ïa ka shi kol lyngba ka ka jingshut corner na u Roshan da kaba sangah da ka khlieh.
Ka Bengaluru FC lyngba katei ka shi kol ka la nang ïakhuntyngeh bad ñion beit sha ka kut jong ka Mumbai City FC ha kaba ka la ïoh ban pynsmiej katto katne ki jingpyshang thep kol. U Chhetri u la ïoh ban khyreit arsien hynrei u Lachenpa u la ïoh ban kem ïa baroh ar.
Kawei kadei ha ka minit kaba khatduh ha kaba u Chhetri u la ïoh ban rah ïa ka bol bad ha ka jingpyrshang thep kol u Lapencha u la ïoh ban kyrda noh. Ka Mumbai City kaba la pyrshang ban pynphai kol hynrei haduh kaba kut ka Bengaluru FC ka la pynliem syndon da 1-0 kol.
Ka Bengaluru FC kan pynkhreh ban wanphai sha ka jingïalehkai ha Sree Kanteerava Stadium ha ka sngi Thohdieng (12-03-2023) na ka bynta ka jingïalehkai semifinal jong ka leg kaba ar.
