Bam smai 12 ngut ki Myntri hakhmat u Modi, u Shah bad 3 ngut ki CM

Shillong, Lber 07 : Ryngkat ka jingïadon lang u Myntri Rangbah duh ka ri, u Narendra Modi bad u Myntri korbar ri, u Amit Shah, u National President ka National People’s Party (NPP) Conrad K Sangma, ula bam smai mynta ka sngi ha phyllaw jong ka Raj Bhavan, hapdeng ka jingïadon lang kiba haïing hasem bad ki nongkyrshan jong jka Pary bad ki heh sorkar.
Nalor u Modi bad u Shah, la ïadon lang ruh u President ka BJP, u JP Nadda, u Myntri Rangbah ka Assam Himanta Biswa Sarma, u Myntri Rangbah ka Sikkim Prem Singh Tamang bad u Myntri Rangbah ka Jharkhand Hemant Soren.
Ryngkat bad u Conrad uba la bam smai ha ka sien kaba ar lynter, kiwei pat kiba la shim smai ki long ki arngut ki Symbud Myntri Rangbah, u Bah Prestone Tynsong bad u Bah Sniawbhalang Dhar.
U Lat ka Jylla, u Phagu Chauhan ula pynbam smai ruh ïa u Marcuise N Marak, Rakkam A Sangma, Kong Ampareen Lyngdoh, Bah Comingone Ymbon bad A T Mondal kiba dei na ka NPP. Kiwei pat ki long u Bah Paul Lyngdoh bad Bah Kyrmen Shylla na ka UDP, Bah A.L.Hek na ka BJP bad u Bah Shakliar Warjri jong ka HSPDP.
Haba ïakren bad ki nongthoh khubor hadien ka jingbam smai, u Conrad ula ïada ïa ka jingbuh arngut ki Symbud Myntri Rangbah da kaba ong ba kam long satia kaba bakla namar mynshuwa ruh la ju don kum kane ka jingpynbeit bad kane ka pyni ïa ka jingkhlaiñ ha ka jingmihkhmat na ki thaiñ bapher bapher jong ka Jylla.
Da kane ka jingpynlong ïa ka sorkar thymmai hapoh ka jingïalam ka NPP, ba la tip kum kaMDA-2, u Myntri Rangbah u ngeit skhem ban pynbteng ïa ka jingtreikam khem shongthait bad ban pynleit jingmut ha ki kam kiba la pyntrei naduh ki san snem bala leit noh.
“Khnang ban nang lah pynjanai shuh shuh ïa ki jingtei kiba don ha Jylla, ngin nang trei shitom ruh ban pynjanai ïa ka koit ka koit bad ka pule dangle, ka ïoh kam ïoh jam ki Samla bad ka kamai kajih ki briew” la ong u Conrad.
U Conrad, u la ong ruh ba ka sorkar thymmai kan pynjanai ïa kiei kiba la leh ha ki san snem bala leit noh, namar ki juh ki skhim kiba la pyntrei ha kine ki snem bala leit noh ki dei kiba biang namar ka jingbiang ka jingkheiñ jingdiah, ka jingpeitngor ba ngi la leh kin nang ïai bteng ha kaban pynthikna ba kine ki skhim kin ai jingmyntoi pura ïa ki nongshongshnong ha manla ki shnong ki thaw.
Haba jubab ia ka jingkylli ba kumno ka Sorkar MDA-2 ba ïalam da ka NPP kan leh halor ka kam tih beaiñ ïa u dewïong, u Myntri Rangbah ula ban jur ba ka Sorkar kam ju ailad satia ïa ka jingtih beaiñ bad kan shim ruh ïa ki sienjam ban pynthikna ba kum kine kijait kam kin ym jia satia. Ula pyntip ruh ba ka sienjam ban tih dewiong da ka jingstad saïan ha Jylla kala nang ïaid mynta.
Halor ki jingkynnoh jong ka BJP pyrshah ïa ka sorkar MDA bala leit noh, u Conrad ula ong ba barabor ki jingiapher jingmut kin mih beit hynrei kaei kaba kham kongsan ka dei ka jingïatreilang bad ban wad ia ka lynti ban pynbeit ïa ki jingeh.