Hapoh kine ki san snem ngin pyndep ban pynbeit pud bad bud dien ILP : Conrad

0

Shillong, Lber 07: U National President ka National People’s Party (NPP) uba long biang u Myntri Rangbah ka Jylla u Conrad K Sangma, ula ong ba ka Party ka la kut jingmut ban pyntreikam ïa ka Inner Line permit (ILP) hapoh Meghalaya bad ban buddien ïa ka kam ban pynbeit noh ïa ka jingïakajia pud bad ka Assam ha poh kane ka samoi san snem.
“Hooid ka thong kadei hi ban pynbeit noh ïa u pud u sam jong ka jylla hapoh kane san snem” la ong u Conrad.
U Conrad ula ong ba ka sorkar jylla bad naka liang ka Party kan shim khia ban ïakren bad ka sorkar pdeng halor ka jingdawa ILP, ban pynrung ïa ka ktien Khasi bad Garo hapoh ka khyrnit ba phra ka Riti Synshar ka ri India.
“Kine ki mat ki dei kiba ha khmat eh jong kane ka sorkar ban wan bad ka party” ula ong. Haba pynshai ïa ki mat bad ka thong ba ka sorkar ka don, u Conrad ula ong ba kane ka sorkar kan ïaleh ban thaw kam na ka bynta ki samla ha kine ki san snem ban wan.
“La ka dei hapoh ka tnat IT sector, hapoh ki san snem ba la dep ka sorkar ka la lah ban thaw kam haduh 3,000 hapoh ki Call Centre bad BPO IT Park bad ka thong naka bynta ki san snem ban wan ka dei ban thaw kam palat 20,000 bad haduh 5,000 tylli ki kam ka sorkar ka la dep mang tyngka” la ong u Conrad.
U Conrad ula ong ba ka sorkar kan kyntiew ïa ka lad ïoh kam hapoh ka tnat jngohkai pyrthei hapoh kane ka jylla namar ka Meghalaya kadei kawei na ki jylla hapoh India kaba paw bha namar ka jingitynnad ka mei mariang.
“Ka sorkar ka sngew ruh ba ka tnat ka rep ka riang kadei kawei ka lad ban kyntiew ïa ka ïoh kam ïoh jam bad nalor kine ka sorkar kan kyntiew ruh ïa ki lad ïoh kam haba ïadei bad ka tnat ka koit ka khiah bad ka pule puthi bad nalor kiwei kiwei de kum hapoh ka tnat Social Sector” ula ong.
Ula ong ba ka sorkar synroplang MDA-I ha ki san snem ba la dep kala kyntiew bha haba ïadei bad ka jingpynïoh surok ha baroh kawei ka jylla.
“Nga kyrmen ba ha ki san snem ban wan baroh ki longïng kin ïoh um bam um dih, ki surok, ki bording bad naka liang ka sorkar kan sa pynkhreh bha ïa ki lynti ïaid ban pynurlong ïa kine baroh” ula ong.
Haba kylli halor ki jingshah kynnoh bamsap, na ka liang u Conrad ula ong ba ka kyntien bamsap ka dei ba la pynmih da kito kiba pyrshah ïa ka sorkar jylla.
“Ki jingkynnoh ki mih hynrei ïa ka kyntien bamsap la pynmih da kito kiba pyrshah ïa ka sorkar hynrei na ka liang ka sorkar MDA kam don ei ei ban buhrieh bad ïa kiei kiei kiba ka Liangpyrshah kala dawa, na ka liang ka sorkar ka la pynurlong” ula ong.

Leave A Reply

Your email address will not be published.