Ker kur ki dkhot sengbhalang ha Shilong Airpot tang shu ïoh jingtip ba wan u nongïalam ka kynhun khang bam doh masi

Nongpoh, Nailur 27: Da ki spah ngut ki nongïalam bad ki dkhot jong ki kynhun sengbhalang bapher bapher naduh ka Khasi Student Union, Hynñiewtrep Youth Council bad ka Hynñiewtrep Integrated Territorial Organisation, mynta ka sngi kila leit ban ker kut ïaka kad liengsuiñ ha Umroi, Ri-Bhoi District hadien ka jingioh jingtip halor ka jingthmu wan iuhkjat u nongïalam ka kynhun khang bam dohmasi bad kheiñ kmie ïaka masi ban leit shim bynta haka rally pyrshah bam doh masi kaba la thmu ban pynlong haka 2 tarik Risaw ha nongbah Shillong.
Kumba la pynpaw da ki kynhun sengbhalang ba u nongïalam ka kynhun kheiñ kmie ïaka masi, u Jagadguru Shankaracharya Swami Shri Avimukteshwaranand Saraswati un wan sha Nongbah Shillong ba wan poi mynta ka sngi ha Umroi Airport hynrei wat hadien bala ap da ki kynhun sengbhalang utei u nongïalam bad ka kynhun ki khlem wan poi satia.
Ban lait na kano kano ka huri hura bad ktah ïaka shongsaiñ shongsaiñ, naka liang u majistor bad ki pulit ka Ri-Bhoi kila poi sha katei ka jaka ban ïakren sngewthuh bad ki kynhun sengbhalang bad pyntip ruh ba utei u nongïalam ka seng Hindu um poi shuh mynta ka sngi ha Umroi Airport bad ba na ka liang ki bor district ki la pyntikna ba kin nym ailad da leieli ïa u ne u nongïalam ban hiar hapoh ka kad liengsuiñ ban lait naka jingjia ba sngewsih.
U Bah James Hittler Mawphñiang General Secretary ka KSU, North Khasi Hills District u la ong ba naka liang ka seng KSU kan nym ailad da lei lei ruh ïa kino kino ki kynhun shitñiam kiba na shabar ban wan batai stad bad mushlia ïaka jinghikai naduh mynbarim bad wat ïaka bam ka dih ka rukom mane blei, ka riam ka beit ne ka lehniam leh rukom, bad ka KSU kan ieng skhem ban pyrshah ïa katei ka jingthmu ki seng Hindu ban pynlong kmie ïaka masi.
U Bah Roykupar Synrem, President ka HYC u la ong ba naka liang ka seng HYC kan nym ailad da lei lei ïaki briew ba nabar ban wan hikai kaei ba ngin bam bad kaei ba ngin dih, ngi don la ka jong ka rukom bam ka rukom dih bad pynrem jur ïa u Myntri Rangbah ka jylla u ba la saitkti ïalade bad khlem nud ang eiei halor ka jingthmu pynlong rally ka kynhun shitñiam ki Hindu, haka jingshisha u dei ma u u khlieh duh jong ka jylla ban peit ïaka shongsuk shongsaiñ hynrei kaba sngew lyngngoh ka long ba mynta u ngiat lut baroh sha ki Deputy Commissioner la kin ai jingbit ne em.
U la ong ba kum ka seng hi da lei lei kan nym ailad ïa katei ka kynhun ba kan wan ban pynlong rally bad wat ban wan iuhkjat ha nongbah Shillong ne kiwei kiwei ki jaka haka jylla bad lada jia eiei, ki bor district bad ka sorkar jylla ki dei ban shim ka jingkitkhlieh