Shillong, Nailur 27: Uwei na ki nongtrei mon sngewbha u Greneth M Sangma ha ka sngi Thohdieng u la pynrem ïa ka jingwan jngoh jong ShankaracharyaSwami Avimukteshwaranand Saraswati Ji Maharaj sha Meghalaya ha ka 28 tarik mynta u bnai ban pynbor ïa ka sorkar pdeng ba kadei ban khang ïa ka jingshoh doh bad ban pynïeng ïa ka lama jong ka Masi.
Ha ka jingkren jong u Sangma u la ong, “Kane ka jingleh kan pynhiar dor ïa ki hok bad ka jinglaitluid jong ki nongshong shnong ka Meghalaya, kiba ïoh ïa ka jinglaitluid ban im ha la ka jong ka rukom im, kumba la buh bad thoh hapoh ka khyrnit kaba 6 bad ka hok ban mane laitluid hapoh ka Riti Synshar ka Ri India.”
“Kum shi bynta na ka jylla kaba bun dei ki Khristan ha kane ka thaiñ North East India, ngi burom ïa baroh ki niam bad ki jingngeit bad ym lah ban shah ka jingthmu kaba sngewniam ban pynthut ïa ka jingim kaba shipara jong ngi. Ha ka rukom im ki Garo jong ngi, ki masi kidei ka pdeng jong ka kolshor bad ki jingleh ha ka imlang sahlang, kynthup ha ki jingïathoh, ki jingïalang bad kiwei ki jingjia kiba kongsan. Ngin ym lah ban pynsngewbha ïa ki jingpyrshang ban buh ki jingpyrkhing ha ki rukom bam jong ngi,” u la ong.
Na ka liang une u nongtrei monsngewbha u la dawa ïa ka kynhun ki Hindu ban burom ïa ki kolshor bad kumjuh ruh ban ithuh bad burom ïa ki rukom im ki paidbah ka Meghalaya kiba don naduh ki longshwa manshwa.
U la ban jur ïa ka jingdonkam ba kane ka jingjia kam dei ban pynkheiñ hapoh ki hok bad ki jinglaitluid ki nongshong shnong ka Meghalaya bad ban pynshlur pat ïa ka jingdonkam ban ïakren bad ban sngewthuh ïa ka jingdon ki jaitbynriew bapher bapher bad ban pynneh ïa ka suk ka saiñ bad u la kyntu ïa baroh ban ïatreilang ban pyrshah ïa kane ka jingthmu ka seng ki Hindu.
