Shillong, Nailur 02: Kumba 4 ngut na jylla Nagaland ki la shah kem halor ka jingkynnoh ba ki la donkti ha ki kam lute ba dang shen ha Umran petrol pump kaba ha Ri Bhoi district.
Kane ka la jia ha ka 25 tarik u Nailar, ha kitei ki runar ki la shoh ïa u manager bad ki nongtrei ka Umran petrol pump, Niangbyrnai bad ki lute ka pisa kumba T. 4,24,614 ha ryngkat bad 3 tylli ki mobile phone.
Na ka liang jong ki pulit ka district ha ka 1 tarik mynta u bnai, ki la kem noh ïa 3 ngut ki briew kiba donkti ha kane ka kam na Dimapur district, Nagaland. Ïa kine la ithuh kyrteng da Bokavi Zhimomi (25), Pashen Lam (32), Rokongulie Keppu (18), ong u SP ka Ri Bhoi u Jagpal Singh Dhanoa ha ka sngi Nyngkong.
Ha ka jingtohkit na ka liang kitei kiba la shah kem ki la kubur ba ki la leh ïa kane ka kam, ong u SP da kaba bynrap ruh ba ïa kitei kiba la shah kem la ïalam sha district court khnang ba ki pulit kin lah ban tohkit kumba 5 sngi ïa ki.
Shuh shuh na ka liang jong u SP u la pyntip ba utei u runar uba saw napdeng jong ki la bat da ki pulit ka Tuensang district, Nagaland bad ka kynhun ki pulit ka Ri Bhoi ki dang mynta ha lynti ban wanlam noh ïa kitei ki runar khnang ban lah ban wan ïalam sha ïingkashari.
Na ka liang jong ki pulit ki la kurup ruh ïa ka kali Bolero kaba don u nombar NL 07 CB 0156 ba la pyndonkam da kitei ki runar ban leh ïa ki kam lute.
