Shillong, Nailur 02: Kan long kaei kaei kaba sngew lyngngoh ban lap ba ka jylla Meghalaya kan dei kaba saw haba ïadei bad ka jingkit ram ba heh duh kat kum ka GSDP ratio hapdeng ki jylla/UT ha ka ri India.
Katkum ka kaiphod jong ka CAG haba ïanujor bad ki 11 tylli ki jylla ka thaiñ Shatei Lam Mihngi bad ki Jylla Himalaya, ka jylla Meghalaya ka wan ha ka kyrdan kaba lai ha kaba kane ka pyni ïa ka jingkiew jong ka jingkitram jong ka jylla.
Ka Kaiphod ka ong ruh ba ka jylla ka lah ban shim ïa ki lad ki lynti ban leh eiei halor kane ka bynta bad ban kiar ïalade na ka jingshim ram, ia kane ka pyntip ha ka kaiphod jong ka State Finances Audit Report jong u snem ba kut ha ka 31 tarik u Risaw, 2023.
Shuh shuh la ong ba ka jingkit ram ha ka Consolidated Fund ka State ki kynthup ïa ki ram ba ïoh nangne nangtai (market loans), ki ram na ki Bank (Financial Institution) bad ki ram bad ki jingshim pisa lypa (advance) na ka sorkar India.
Ka kaiphod ka la ong ba ha u snem 2022-23, ka jingkit ram ka Sorkar ka long haduh T.14,637.12 klur. Kane ka kynthup ïa ka ram ba shim nangne nangtai kaba kot T.11,285.50 klur tyngka, ka ram na ki bank kaba kot T.1,349.04 klur bad ka ram bad ka jingpisa lypa na ka sorkar India kaba long T. 2,002.58 klur.
“Ka jingkiew jong ka ram sorkar ha u snem 2022-23 haba ïanujor bad u snem 2021-22 (T. 12, 165.98 klur) ka long haduh 20.31 percent. Kane ka dei nyngkong eh namar ka jingkiew ki ram bad ki jingshim pisa lypa na ka GOI (117.40 percent) bad ki ram ba shim nangne nangtai (13.79 percent),” ong ka kaiphod.
Na ka liang ka kaiphod CAG ka la kdew ba ka ram ha ka Consolidated Fund jong ka Jylla ki la kiew da 20.74 percent ha u snem 2022-23 ban ïa u snem 2021-22 khamtam eh namar ka jingkiew jong ki ram ba shim nangne nangtai da 13.79 percent bad ki ram bad ki jingshim pisa lypa na ka GOI da 161.90 percent ha u snem 2022-23 ban ïa u snem 2021-22.
Shuh shuh ka jylla kam shym la lah ban pynurlong ïa ka total outstanding liabilities kat kum ka GSDP ratio kaba long 28 percent kaba la buh da ka Meghalaya Fiscal Responsibility and Budget Management (MFRBM) Act, 2006 na ka bynta u snem 2018-19 haduh 2022-23, bynrap ka kaiphod.
