Shillong, Nailur 02: Ka sorkar jylla ka la pynphai noh ïa ka pisa kaba kot kumba T. 3,252.82 klur ha ka snem 2023 na ka daw jong ka jingbym lah ban pyndonkam.
Ïa kane la pynpaw da ka kaiphod Comptroller and Auditor General of India (CAG) ha ki jingkynthoh halor ka audit report kaba ïadei bad ka pisa kaba kut ha ka 31 tarik u bnai Lber, 2023.
“Katkum ka jingkheiñ na ka Appropriation Accounts 2022-23 ka la pynpaw ba na ka jingpynlang kaba long T. 3,971.22 klur, ka pisa kumba T. 3,252.82 klur (81.91 per cent) la pynphai noh. Ïa kane ka pisa baroh la pynphai ha u bnai Lber 2023,” ong ka kaiphod CAG.
Ka kaiphod ka ong ruh ba kine ki jingpynphai ki la long palat T. 100 klur ba la leh ha ki san tylli ki Grant (revenue section) bad Grant (capital section) ha kiba bun ki bynta kum ka jingbym ïoh ïa ki receipt kumba la mang, ka jingpynlut kaba duna bad kiwei kiwei.
Na kine ki 6 tylli ki kam, na baroh ka pisa kaba long T. 9,602.94 klur kaba long halor ka Grants/Appropriations, kaba T. 1,611.72 klur la pynphai noh da ka sorkar.
“Kane ka dei ka jingpynkheiñ ïa ka Budget Manual bad ka ktah ruh ïa ka rukom pynïaid ha ka mang tyngka,” ong ka kaiphod CAG.
Ka kaiphod ka ïathuh ruh ba ka jingpynlut kaba long palat ïa ki Grant kadei ka kam kaba pynkheiñ ïa ka Article 204 (3) jong ka riti synshar jong ka ri.
Ka kaiphod ka ong ruh ba ka pisa kumba T. 1,093 klur (63.40 percent) la pyndonkam na ka pisa kaba la buh kumba T.1,724.02 klur.
La ong ba ka jingpynlut na ka Consolidated Fund jong ka jylla khlem ka jingmynjur ka ïing dorbar ka long kaba pynkheiñ ïa ki kyndon.
Ha ka snem 2022-23, ka sorkar jylla ka buh ïa ka jingpynlut ka bymdei kaba la kot sha ka T. 0.70 klur hapoh ka Capital Section ha ka jaka jong ka Revenue Section (Minor Work). Kane ka la pynmih ïa ka jingkynthoh hapoh ka Revenue Deficit (T. 43.90 klur) da ka T. 0.70 klur.
Na ka liang CAG ka la kyntu ïa ka sorkar ban pynbha ïa ki rukom treikam khnang ban pynmih pisa na ka bynta ka jylla.
