Kan long ka jingkmen lada kiwei ruh ki nongïalam ka BJP ki rung sha ka NPP : Rakkam

Shillong, Nailur 6 : U Myntri ka tnad pule puthi ka jylla u Rakkam A Sangma mynta ka Sngi Balang u la pynpaw ba kan long ka jingkmen kaba khraw lada kiwei kiwei ki nongïalam ka BJP naduh u Myntri Rangbah duh ka ri u Narendra Modi, u Myntri kam pohïing ka ri u Amit Shah bad kiwei kiwei ki nongïalam naduh Delhi haduh Meghalaya ruh ba kin wan ban pynïasoh sha ka National Peoples Party (NPP).
ïa kane u la kren hadien ba u la ioh jingtip ba u Nongaibuit jongka tnad pule puthi bad u MLA ba rim ka Mawsynram u bah H.M Shangpliang u la mih noh na ka BJP mynta ka sngi bad u la pynkhreh ban pynïasoh noh sha ka NPP namar u don ruh ka jingthmu ban ïa aireng ïa ka election MP Lok Sabha na kane ka party.
U Sangma u la ong “Nga dang shu ïoh jingtip ïa kane na ki lad pathai khubor bd ngam pat tip la un pynïasoh sha ka NPP ne sha kiwei ki party ruh hynrei ngan kmen eh lada u bah Shangpliang bad kiwei ki nongïalam ka BJP ruh ki pynïasoh noh sha ka NPP. Ngin pdiang sngewbha ym tang ïa ki BJP hynrei ïa kiwei ki nongïalam na kiwei kiwei ki party ruh ngi kloi ban pdiang lada ki wan ban pynïasoh namar ka jingkhang jongka NPP ka ïai plie bad kumba long mynta tang ka NPP kaba dei ka National Party na kane ka thaiñ shatei lam mih ngi ka ri India” .
U la ong ka BJP ruh mynshwa kam long ei ei hynrei mynta ka la ïalam ïa ka jingsynshar ha ka ri. Kumjuh ruh ka NPP ka lah ban don hangne mynta hynrei lashai la shisngi ka lah ban long da kumwei pat namar ka NPP ka long kum ka jingkieng kaba pun lynti na ka bynta ki paidbah ka ri.
U la ong ba kane ka party mynta ka la long kaba la pdiang lut da baroh bad kane ka long na ka jingsbun mynsiem bad tbit jong u National President uba long ruh u Myntri Rangbah ka jylla u Conrad K Sangma.
“ Namar ka jingtbit jong u kum u nongïalam ka la ai mynsiem ïa kiba bun ban pynïasoh sha ka NPP. Kumta nga ruh nga kyntu ïa baroh ban wan pynïasoh sha ka NPP namar dei tang kane ka party ka ban pun jingkieng ban pynïasoh ïa kane ka thaiñ bad kiwei ki bynta jongka ri. Nalor kata kane ka thaiñ ka donkam ban ïoh bun ngut ki MP ha nongbah Delhi khnang ba ka sur kan sawa haba ki kren bad dawa ïa kaba dei hok” ong u Rakkam.
U la ong ruh ba ha kane ka kynti ban wan ka NPP kan jop ïa ka Shillong Parliamentary Constituency bad kan wan phai biang ruh na ka Tura Parliamentary Constituency. U la ong ba ka Shillong Parliamentary Constituency ka donkam ia u briew uba tbit ban leit mihkhmat sha Delhi.